Lunavada: મહારાણી સજ્જન કુંવરબાએ પોતાના પોકેટમનીમાંથી હાઇસ્કૂલનું નિર્માણ કરાવ્યું હતું

મહીસાગર જિલ્લાના મુખ્ય મથક લુણાવાડામાં આવેલી શ્રી સજ્જન કુંવરબા હાઇસ્કૂલ (જે ટૂંકમાં એસ. કે. હાઇસ્કૂલ તરીકે ઓળખાય છે) માત્ર એક શાળા નથી, પરંતુ આ વિસ્તારના શિક્ષણની ગંગોત્રી છે.

લુણાવાડાના રજવાડા શાસન અને રાજવી પરિવારના શિક્ષણ પ્રત્યેના અપ્રતિમ અભિગમની સાક્ષી પૂરતી આ શાળા આજે પણ એક મજબૂત સ્તંભ તરીકે ઊભી છે.

આ શાળાનો ઇતિહાસ આશરે દોઢ સદી જેટલો જૂનો છે. હાલમાં આ શાળા પોતાની સ્થાપનાના 148 વર્ષ પૂર્ણ કરી ચૂકી છે. આઝાદી પહેલાં, જ્યારે આ વિસ્તારમાં ઉચ્ચ શિક્ષણની સુવિધાઓ નહિવત હતી, ત્યારે લુણાવાડા સ્ટેટના રાજવી પરિવાર દ્વારા આ પ્રદેશના બાળકો આધુનિક શિક્ષણ મેળવી શકે તેવા ઉમદા આશયથી આ શાળાની શરૂઆત કરવામાં આવી હતી.

આ શાળાના ઇતિહાસનું સૌથી સોનેરી પાનું એ છે કે લુણાવાડાના રાજવી પરિવારના આદરણીય સભ્યા મહારાણી સજ્જન કુંવરબાના નામ પરથી આ શાળાનું નામકરણ કરવામાં આવ્યું છે. ? એ જમાનામાં સ્ત્ર્રી શિક્ષણ અને સામાન્ય પ્રજાના શિક્ષણ માટે મહારાણી સજ્જન કુંવરબાએ પોતાના વ્યક્તિગત ખર્ચ (પોકેટ મની) માંથી 25000 (પચીસ હજાર રૂપિયા) નું માતબર યોગદાન આપ્યું હતું. તે સમયગાળામાં આ રકમ ખૂબ જ મોટી ગણાતી, જે તેમની શિક્ષણ પ્રત્યેની દીર્ઘદ્રષ્ટિ અને સંવેદનશીલતા દર્શાવે છે. મહારાણી દ્વારા શરૂ કરાયેલ શિક્ષણના આ મહાયજ્ઞની જ્યોત આજે પણ એટલે કે 148 વર્ષ બાદ પણ પ્રજ્જવલિત છે. હાલમાં આ શાળાનું સંચાલન લુણાવાડા કેળવણી મંડળ હસ્તક છે. જેના પ્રમુખ મુનેન્દ્રભાઈ પટેલ છે. શાળા ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ (GSEB) સાથે સંલગ્ન સરકારી અનુદાનિત (Government-Aided) સંસ્થા છે, જ્યાં વિજ્ઞાન પ્રવાહ (Science) અને સામાન્ય પ્રવાહ (Arts/Commerce) નું ઉત્કૃષ્ટ શિક્ષણ આપવામાં આવે છે.

ગુજરાતના વધુ સમાચાર વાંચવા માટે ક્લિક કરો