વિસનગર-ખેરાલુ હાઈવે પર સુંઢિયા ગામની આંબાવાડી નજીક પુરઝડપે આવતી ફોર્ચ્યુનર કારે બાઈકને પાછળથી ટક્કર મારતાં અકસ્માત સર્જાયો હતો. જેમાં બાઈકચાલકનું ઘટનાસ્થળે જ મોત નીપજ્યું હતું, જ્યારે તેમની પત્નીને ગંભીર ઈજાઓ પહોંચી હતી.
પોલીસ ફરિયાદ મુજબ, ખેરાલુ તાલુકાના ચાણસોલ ગામના રહેવાસી મુકેશભાઈ લક્ષ્મણભાઈ સથવારા (ઉં.વ. 47) અને તેમનાં પત્ની સરોજબેન (ઉં.વ. 45) બપોરના સમયે મોટરસાઈકલ (નં.GJ-02-HE-7333) પર વિસનગર ખાતે સસરાની ખબરઅંતર પૂછવા જઈ રહ્યાં હતાં. આ દરમિયાન સુંઢિયા આંબાવાડી નજીક પાછળથી પુરઝડપે અને ગફ્લતભરી રીતે આવી રહેલી સફેદ રંગની ફોર્ચ્યુનર કાર (નં.GJ-16-BG-6852)ના ચાલકે તેમના બાઈકને જોરદાર ટક્કર મારી હતી. અકસ્મામાં મુકેશભાઈનું ઘટનાસ્થળે જ મોત નીપજ્યું હતું, જ્યારે બાઈક પાછળ બેઠેલાં સરોજબેનને શરીરે ગંભીર ઈજાઓ પહોંચતાં વડનગર સિવિલ હોસ્પિટલમાં ખસેડવામાં આવ્યાં હતાં. જ્યાં તેમને બેભાન અવસ્થામાં સારવાર હેઠળ રાખવામાં આવ્યાં હતાં.
