નવસારી જિલ્લા પોલીસની સ્પેશિયલ ઓપરેશન ગ્રુપ (SOG)ની ટીમે નશા વિરોધી અભિયાન અંતર્ગત એક મોટી સફળતા મેળવી છે. વાંસદા તાલુકાના અંતરિયાળ ઓઝરપાડા ગામમાં ખેતીની આડમાં ઉગાડવામાં આવેલા ગાંજાના જથ્થાને પોલીસે ડ્રોન ટેકનોલોજીની મદદથી ઝડપી પાડ્યો છે.

ડ્રોન કેમેરાએ ખોલી પોલ

એસ.ઓ.જી.ની ટીમ જ્યારે વિસ્તારમાં પેટ્રોલિંગમાં હતી, ત્યારે તેમને મળેલી ચોક્કસ બાતમીના આધારે ઓઝરપાડા ગામમાં તપાસ હાથ ધરી હતી. સીધા નિરીક્ષણ દરમિયાન જે વિગતો નહોતી દેખાતી તે પોલીસે ડ્રોન કેમેરા હવામાં ઉડાડીને શોધી કાઢી હતી. ડ્રોન ફૂટેજમાં ખેતરમાં વનસ્પતિજન્ય ગાંજાના છોડ હોવાનું સ્પષ્ટ જણાતા પોલીસે તાત્કાલિક દરોડો પાડ્યો હતો.

મુદ્દામાલ અને ધરપકડ

પોલીસે ખેતરમાં તપાસ કરતા ગાંજાના નાના-મોટા કુલ 94 છોડ મળી આવ્યા હતા, જેનું કુલ વજન 3.525 કિલોગ્રામ હતું. આ જથ્થાની બજાર કિંમત અંદાજે ₹1,76,250 આંકવામાં આવી છે. પોલીસે કુલ ₹1,81,300નો મુદ્દામાલ જપ્ત કરીને મુખ્ય આરોપી મનીષ ભગરીયાની સ્થળ પરથી ધરપકડ કરી છે. આરોપી પોતાના મકાનની બાજુમાં આવેલા ખેતરમાં જ આ નશીલા પદાર્થની ખેતી કરતો હતો.

આ પણ વાંચો: પ્રદેશ ભાજપા અધ્યક્ષ જગદીશ વિશ્વકર્માએ કર્ણાવતીના વિરાટનગર વોર્ડમાં કાર્યકર્તાઓ સાથે બેઠક યોજી