ઊંઝા-મહેસાણા હાઇવે પર આવેલા ઉનાવા પાસે એક કાળજું કંપાવી દે તેવો અકસ્માત સર્જાયો છે. રાજસ્થાનથી લગ્ન પ્રસંગ માણીને અમદાવાદ પરત ફરી રહેલા એક પરિવારની ઇકો કાર બેકાબૂ બની ડિવાઇડર સાથે અથડાતા ગમખ્વાર અકસ્માત સર્જાયો હતો. આ દુર્ઘટનામાં પરિવારના 4 સભ્યોના ઘટનાસ્થળે જ કરુણ મોત નિપજ્યા છે, જ્યારે કાર ચાલકને ગંભીર ઇજાઓ પહોંચતા સારવાર અર્થે ખસેડવામાં આવ્યો છે.
લગ્નની ખુશી માતમમાં ફેરવાઈ
મળતી માહિતી મુજબ, મૂળ રાજસ્થાનના પાલી (ભાવનગર) ના વતની અને હાલ અમદાવાદના રામોલ વિસ્તારમાં રહેતા કુમાવત પરિવારના સભ્યો રાજસ્થાનમાં એક લગ્ન પ્રસંગ પતાવીને પોતાની ઇકો કારમાં અમદાવાદ પરત ફરી રહ્યા હતા. ઉનાવા પાસે પહોંચતા જ કાર ચાલકે સ્ટીયરિંગ પરથી કાબૂ ગુમાવ્યો હતો અને કાર પૂરપાટ ઝડપે રોડની વચ્ચે આવેલા ડિવાઇડર સાથે ધડાકાભેર અથડાઈ હતી. અકસ્માત એટલો ભયાનક હતો કે કારનો કચ્ચરઘાણ નીકળી ગયો હતો.
