મહેસાણામાં આવેલી સ્ટેટ R&B (માર્ગ અને મકાન વિભાગ) ની પેટા વિભાગની ઓફિસમાં આજે અચાનક આગ લાગવાની ઘટના બનતા અફરાતફરી મચી ગઈ હતી. ઓફિસના કમ્પાઉન્ડમાં ખુલ્લામાં પડેલા જૂના ભંગારના જથ્થામાં અચાનક આગ લાગી હતી. જોતજોતામાં આગની જ્વાળાઓ અને ધુમાડાના ગોટેગોટા આકાશમાં ઉંચે સુધી દેખાતા ઓફિસના કર્મચારીઓ અને આસપાસના રહીશોમાં ગભરાટ ફેલાયો હતો.
ફાયર બ્રિગેડની ટીમે આગ પર મેળવ્યો કાબૂ
ફાયર વિભાગને આગ લાગતાની સાથે જ જાણ કરી દેવામાં આવી હતી. મહેસાણા ફાયર બ્રિગેડની ટીમ તાત્કાલિક ઘટનાસ્થળે દોડી આવી હતી અને પાણીનો મારો ચલાવી આગ પર કાબૂ મેળવવાની કામગીરી શરૂ કરી હતી. ત્યારબાદ ફાયર ફાઈટરોની ત્વરિત કામગીરીને કારણે આગ વધુ ફેલાતી અટકાવી હતી અને તેને ઠારી દેવામાં આવી હતી. સદનસીબે આ ઘટનામાં કોઈ જાનહાનિના સમાચાર નથી.
