મહેસાણા જિલ્લા પંચાયતમાં નવી ટીમની રચના કરવામાં આવી છે. જિલ્લા પંચાયત પ્રમુખ પદે નીતિન પટેલ ખરોડની બિનહરીફ નિમણૂક કરવામાં આવી હતી, જ્યારે ઉપપ્રમુખ પદે માસંગજી ઠાકોરની પસંદગી પણ બિનહરીફ રીતે થઈ હતી. જિલ્લા પંચાયતના હોદ્દેદારોની આ વરણી બાદ સ્થાનિક રાજકીય માહોલમાં ચર્ચાઓ તેજ બની છે. બિનહરીફ નિમણૂકને સંગઠનની આંતરિક એકતા અને સહમતિનું પ્રતિબિંબ માનવામાં આવી રહ્યું છે.
કારોબારી અને દંડક પદે જવાબદારીઓ સોંપાઈ
જિલ્લા પંચાયતની કારોબારી સમિતિ માટે ચૌધરી હસમુખભાઈને જવાબદારી સોંપવામાં આવી છે. સાથે જ દંડક તરીકે દેસાઈ ભરતભાઈની નિમણૂક કરવામાં આવી છે. નવા હોદ્દેદારોને પંચાયતની કામગીરી વધુ અસરકારક રીતે આગળ વધારવા મહત્વપૂર્ણ જવાબદારીઓ સોંપવામાં આવી છે. ગ્રામ્ય વિસ્તારોમાં વિકાસ કામોને ગતિ આપવી, પાણી, રસ્તા, આરોગ્ય અને શિક્ષણ જેવા પ્રશ્નોના ઝડપી નિરાકરણ માટે નવી ટીમ મહત્વની ભૂમિકા ભજવશે તેવી અપેક્ષા વ્યક્ત કરવામાં આવી રહી છે.