અરવલ્લી જિલ્લામાં હવામાન વિભાગ દ્વારા ભારે વરસાદની આગાહી વચ્ચે આજે શુક્રવારે દિવસ દરમિયાન બે એક તાલુકાઓને બાદ કરતાં અન્યત્ર તાલુકાઓમાં છૂટોછવાયો વરસાદ નોંધાયો હતો. મોડાસામાં સવારે 10થી 12 દરમિયાન ધોધમાર સવા ઇંચ ઉપરાંત વરસાદ પડયો હતો. આ સિવાસ ધનસુરામાં એક ઇંચ વરસાદ વરસ્યો હતો. જિલ્લાના છૂટાછવાયા વિસ્તારોમાં ભારેથી અતિભારે વરસાદની સંભાવનાઓ વચ્ચે આવતીકાલે શનિવારે ઓરેન્જ એલર્ટ પણ જાહેર કરવામાં આવ્યું છે. આ પરિસ્થિતિને ધ્યાનમાં રાખીને જિલ્લા વહીવટીતંત્રે નેશનલ ડિઝાસ્ટર રિસ્પોન્સ ફોર્સ-એનડીઆરએફની એક ટીમને જિલ્લામાં તૈનાત કરી છે.
એનડીઆરએફની આ ટીમને બોટ્સ, લાઇફ્ જેકેટ્સ, જરૂરી આધુનિક સાધનો અને સંચાર સુવિધાઓ સાથે તૈનાત કરવામાં આવી છે. આ ટીમ વરસાદને કારણે ઉદભવી શકે તેવી પૂર, પાણી ભરાવા, મકાનોના નુકસાન કે અન્ય કોઈપણ આપત્તિની સ્થિતિમાં તાત્કાલિક રાહત અને બચાવ કાર્યો હાથ ધરવા માટે સજ્જ છે. એનડીઆરએફ ટીમના ઇન્સ્પેક્ટર વિનીતસિંગે જણાવ્યું હતું કે, અમારી ટીમ સંપૂર્ણ તૈયારી સાથે જિલ્લામાં તૈનાત છે. અમે સ્થાનિક વહીવટીતંત્ર સાથે સતત સંકલન જાળવી રહ્યા છીએ. કોઈ પણ આપત્તિની સ્થિતિમાં તાત્કાલિક બચાવ કાર્ય હાથ ધરવા માટે અમારી ટીમ તત્પર છે.