મોરબી પોલીસે વાંકાનેર વિસ્તારમાં અસામાજિક તત્વો દ્વારા સરકારી જમીન પર કરવામાં આવેલા દબાણ સામે આકરા પગલાં લીધા છે. પોલીસે બુલડોઝર ફેરવીને આ દબાણો દૂર કર્યા છે, જેના કારણે રીઢા ગુનેગારોમાં ફફડાટ વ્યાપી ગયો છે.
વાંકાનેરમાં અસામાજિક તત્વોના દબાણ પર બુલડોઝર
પ્રાપ્ત માહિતી અનુસાર, વાંકાનેરમાં શરીર સંબંધિત અને અન્ય અલગ-અલગ ગુનાઓમાં સંડોવાયેલા બે માથાભારે શખ્સો - જુમ્મો ઉર્ફે અનવર કાળું શેખ અને નવઘણ ભલુભાઈ વિકાણી દ્વારા સરકારી જમીન પર ગેરકાયદેસર દબાણ કરવામાં આવ્યું હતું. મોરબી પોલીસ દ્વારા આ બન્ને રીઢા ગુનેગારોની મિલકત સામે કાર્યવાહી હાથ ધરવામાં આવી હતી. પોલીસે બુલડોઝરની મદદથી આ દબાણો તોડી પાડ્યા હતા. જે સરકારી જમીન પર દબાણ કરવામાં આવ્યું હતું તેની કિંમત આશરે 10 લાખ જેટલી આંકવામાં આવી રહી છે.
