મોરબી જિલ્લાના ગ્રામ્ય વિસ્તારમાં ખેતમજૂર મહિલાઓ પર આચરવામાં આવેલા દુષ્કર્મના બે ચકચારી અને હૃદયદ્રાવક ગુનાઓનો એલસીબી પોલીસે ગણતરીના દિવસોમાં જ પર્દાફાશ કર્યો છે. ખેતરોમાં હથિયારોના ધાકે આતંક મચાવતી કુખ્યાત દેવીપૂજક ગેંગના 3 મુખ્ય આરોપીઓ અને 1 કાયદાના સંઘર્ષમાં આવેલા કિશોરને પોલીસે દબોચી લીધા છે. આ નરાધમોની ધરપકડ સાથે જ મોરબી પંથકમાં ભયનો માહોલ ફેલાવનાર ગેંગના કાળા કારનામાઓ પરથી પડદો ઊંચકાયો છે.
મહિલાના પતિની નજર સામે જ તેની પર દુષ્કર્મ આચર્યું
પોલીસ તપાસમાં બહાર આવેલી વિગતો અનુસાર, ગત 4 અને 5 જૂનના રોજ અલગ-અલગ ગ્રામ્ય વિસ્તારોમાં હેવાનીયતની તમામ હદો પાર કરતી બે ઘટનાઓ બની હતી. આ નરાધમો રાત્રિના સમયે લૂંટ કરવાના ઈરાદે ખેતરોમાં ત્રાટકતા હતા અને ત્યાં રહેતા શ્રમિક પરિવારોને હથિયાર બતાવી બાનમાં લેતા હતા. જેમાં ૪ જૂનના રોજ બનેલી એક ઘટનામાં આ ક્રૂર શખ્શોએ મહિલાના પતિની નજર સામે જ તેની પર દુષ્કર્મ આચર્યું હતું.
