Morbi: તંત્રનું બુલડોઝર યથાવત, લાતી પ્લોટ વિસ્તારમાં 30થી વધુ ગેરકાયદે બાંધકામો જમીનદોસ્ત

મોરબી શહેરમાં ગેરકાયદેસર દબાણો સામે તંત્રએ લાલ આંખ કરી છે. સતત બીજા દિવસે પણ મોરબી મહાનગરપાલિકા દ્વારા કડક કાર્યવાહી હાથ ધરવામાં આવી હતી, જેમાં શહેરના જાણીતા લાતી પ્લોટ નંબર ૬ વિસ્તારમાં બુલડોઝર ફેરવી દેવામાં આવ્યું હતું.ગેરકાયદેસર રીતે ખડકી દેવાયેલા દબાણોને હટાવવા માટે પાલિકાની ટીમ ચુસ્ત પોલીસ બંદોબસ્ત સાથે મેદાનમાં ઉતરી હતી.

 ગેરકાયદેસર દબાણો સામે તંત્રએ લાલ આંખ 

આ ઓપરેશન દરમિયાન 30થી વધુ કાચા-પાકા મકાનો અને અન્ય વ્યાપારી બાંધકામો તોડી પાડવામાં આવ્યા હતા.જાહેર માર્ગો અને સરકારી જમીન પર વર્ષોથી જમાવાયેલા કબજાને દૂર કરી રસ્તો ખુલ્લો કરવામાં આવ્યો હતો.સ્થાનિક સ્તરે કોઈ અનિચ્છનીય ઘટના ન બને તે માટે સુરક્ષા વ્યવસ્થા જાળવી રાખવામાં આવી હતી.

ભવિષ્યમાં વધુ કડક પગલાં

તંત્રના જણાવ્યા અનુસાર, આ કાર્યવાહી માત્ર શરૂઆત છે. મોરબીના અલગ-અલગ વિસ્તારોમાં સર્વે કરવામાં આવ્યો છે અને આગામી દિવસોમાં અન્ય વિસ્તારોમાં પણ આ પ્રકારે દબાણો દૂર કરવાની પ્રક્રિયા ચાલુ રહેશે. લાતી પ્લોટ બાદ હવે શહેરના મુખ્ય માર્ગો અને ભીડભાડ વાળા વિસ્તારોમાં પણ તંત્રનું બુલડોઝર ફરી વળે તેવી પૂરી શક્યતા છે. આ સતત બીજા દિવસની કાર્યવાહીથી ભૂમાફિયાઓ અને ગેરકાયદે બાંધકામ કરનારાઓમાં ફફડાટ વ્યાપી ગયો છે. મહાનગરપાલિકાના આ આક્રમક વલણથી શહેરના રસ્તાઓ વધુ પહોળા થશે અને ટ્રાફિક તેમજ સ્વચ્છતાની સમસ્યામાં ઘટાડો થશે તેવી આશા છે.

વધુ સમાચાર વાંચવા ડાઉનલોડ કરો સંદેશ ન્યૂઝ એપ