મોરબીના હળવદ તાલુકાના ચરાડવા ગામ પાસે આજે એક હૃદયદ્રાવક અકસ્માત સર્જાયો હતો. પુરપાટ ઝડપે આવી રહેલા એક ટ્રકે બાઈક સવાર યુવકને અડફેટે લેતા તેનું ઘટનાસ્થળે જ કમકમાટીભર્યું મોત નીપજ્યું હતું. આ અકસ્માત એટલો ભયાનક હતો કે યુવકને સંભાળવાની તક પણ મળી નહોતી.
સેવા કરવા જતાં જ કાળ આંબી ગયો
મળતી માહિતી મુજબ, હળવદના પાંડાતીર્થ ગામના વતની કુલદીપસિંહ અસવાર (ઉંમર ૩૦) નામના યુવાનનું આ અકસ્માતમાં મોત થયું છે. કુલદીપસિંહના સગા મેરૂપર માતાજીના મંદિરે પગપાળા સંઘમાં જઈ રહ્યા હતા. પોતાના પરિચિતો અને સગાઓને ગરમીમાં રાહત મળે તે માટે તેઓ ઠંડુ પીણું (કોલ્ડ ડ્રિંક્સ) લઈને જઈ રહ્યા હતા. સેવાની આ પ્રવૃત્તિ દરમિયાન જ ચરાડવા પાસે કાળમુખો ટ્રક આડો ઉતર્યો હતો.
