નડિયાદ બિલોદરા જિલ્લા જેલના કાચા કામના બે કેદી આ વખતે ધો. 12ની બોર્ડની પરીક્ષા આપશે. આ બંને કેદીઓને અભ્યાસ માટે જરૂરી પુસ્તકો અને શૈક્ષણિક કિટ પણ પૂરી પાડવામાં આવી છે.
ખેડા જિલ્લા શિક્ષણાધિકારી કચેરીના આર.પી. સુમેરાએ જણાવ્યું હતું કે, ગુજરાત માધ્યમિક અને ઉચ્ચત્તર માધ્યમિક શિક્ષણ બોર્ડ દ્વારા લેવામાં આવતી ધો.10 અને 12 ની પરીક્ષા તા. 26 ફેબ્રુઆરીના રોજ શરૂ થનાર છે. આ પરીક્ષાને લઇને શિક્ષણ વિભાગ દ્વારા તડામાર તૈયારીઓ ચાલી રહી છે. આ વર્ષે ધો. 10ના 29724 વિદ્યાર્થીઓ, ધો. 12 સામાન્ય પ્રવાહના 15445 અને ધો. 12 વિજ્ઞાન પ્રવાહના 2442 મળીને કુલ 47611 વિદ્યાર્થીઓ પરીક્ષા આપનાર છે. જેમાં નડિયાદ બિલોદરા જિલ્લા જેલના કાચા કામના કેદી તરીકે જેલ ભોગવી રહેલા બે કેદી ભાઇઓ ધો. 12 સામાન્ય પ્રવાહની પરીક્ષા આપશે. આ બંને કેદીઓ રિપીટર તરીકે પરીક્ષા આપશે. જેલ વિભાગ દ્વારા આ બંને કેદીઓ માટે જરૂરી પુસ્તકો અને શૈક્ષણિક કિટ પૂરી પાડવામાં આવી છે. પરીક્ષાના સમયે આ બંને કેદીઓને પોલીસ જાપ્તા સાથે વડોદરા જિલ્લા મધ્યસ્થ જેલ ખાતેના પરીક્ષા કેન્દ્રમાં લઇ જવામાં આવશે. જયાં બંને કેદીઓ શાંતિપૂર્ણ રીતે પરીક્ષા આપે તેવું આયોજન કરવામાં આવે છે. પરીક્ષા પૂર્ણ થયા બાદ પરત નડિયાદ જેલમાં લાવવામાં આવશે.
