નર્મદા જિલ્લા એલસીબીની ટીમે દેડિયાપાડા તાલુકાના નિવાલ્દા ગામ નજીક નાયરા પેટ્રોલ પંપ પાસેથી મોટી કાર્યવાહી હાથ ધરી ભારતીય બનાવટનો વિદેશી દારૂનો જથ્થો ઝડપી પાડયો હતો. પોલીસે કુલ રૂા. 79,46,984નો મુદ્દામાલ કબજે કરી એક આરોપીની ધરપકડ કરી છે, જ્યારે એક આરોપીને વોન્ટેડ જાહેર કરી તેની શોધખોળ હાથ ધરી છે.
પોલીસ ફરિયાદ મુજબ, તા. 26 જુલાઈ, 2026ના રોજ સાંજે આશરે 7:15 કલાકે નર્મદા એલસીબીને મળેલી બાતમીના આધારે નાકાબંધી દરમિયાન મહારાષ્ટ્રની નંબર પ્લેટ ધરાવતા ટાટા આઇસર કન્ટેનરને રોકી તપાસ કરવામાં આવી હતી. તપાસ દરમિયાન કન્ટેનરમાંથી ભારતીય બનાવટની વિદેશી દારૂની 33,552 ક્વાર્ટર બોટલો (કિંમત અંદાજે રૂા.64,41,984) મળી આવી હતી.આ ઉપરાંત પોલીસે દારૂ ભરેલો ટાટા આઇસર કન્ટેનર (કિંમત રૂપિયા 15 લાખ) અને એક મોબાઇલ સહિત કુલ રૂપિયા 79.46 લાખનો મુદ્દામાલ જપ્ત કર્યો હતો.