જલાલપોર તાલુકાના મરોલી પંથકમાં રેલવે તંત્રની ભારે બેદરકારી અને આયોજનના અભાવે સ્થાનિક ખેડૂતો અને રાહદારીઓ માટે મુશ્કેલી સર્જાઈ છે. મરોલી નજીક પોંસરા ગામની હદમાં રેલવે દ્વારા બનાવવામાં આવેલા બે અંડરપાસ છેલ્લા ઘણા સમયથી પાણીમાં ગરકાવ થઈ ગયા છે. આશ્ચર્યની વાત તો એ છે કે આ વિસ્તારમાં છેલ્લા દોઢ મહિનાથી એક પણ ટીપું વરસાદ પડયો નથી છતાં બંને અંડરપાસમાં હજુ પણ અંદાજે 6થી 7 ફૂટ જેટલું પાણી ભરાયેલું જોવા મળે છે.

સ્થાનિક ગ્રામજનોના જણાવ્યા પ્રમાણે પોંસરા ગામની હદમાં બનેલા આ બે અંડરપાસ પૈકી માત્ર એક જ અંડરપાસના નિર્માણ પાછળ અંદાજે સાડા ત્રણ કરોડ રૂપિયાનો મસમોટો ખર્ચ કરવામાં આવ્યો છે. લાખો-કરોડો રૂપિયાના માતબર ખર્ચે તૈયાર થયેલા આ અંડરપાસનો મુખ્ય હેતુ લોકો અને વાહનચાલકોને સુવિધા પૂરી પાડવાનો હતો. પરંતુ પાણીના નિકાલની યોગ્ય વ્યવસ્થાના અભાવે હાલમાં આ બંને અંડરપાસ સંપૂર્ણપણે ઉપયોગવિહોણા બની ગયા છે અને જાણે 'શોભાના ગાંઠિયા' સમાન સાબિત થઈ રહ્યા છે.

પોંસરા ગામના અનેક ખેડૂતોની ખેતીની જમીન રેલવે લાઇનના સામેના ભાગે આવેલી છે. અંડરપાસમાં પાણી ભરાયેલા હોવાને કારણે ખેડૂતો પોતાના ટ્રેક્ટર, બળદગાડા કે અન્ય ખેતીના સાધનો લઈને ખેતર સુધી પહોંચી શકતા નથી. ખેતીની આ મહત્ત્વપૂર્ણ સિઝનમાં સમયસર ખેતરે પહોંચવું અનિવાર્ય હોય છે, પરંતુ અંડરપાસ બંધ હોવાથી ખેડૂતોએ મરોલી ઓવરબ્રિજ પરથી ફરીને આશરે 10 કિલોમીટર જેટલું વધારાનું અંતર કાપવું પડી રહ્યું છે. આ વધારાના અંતરને કારણે ખેડૂતોનો કિંમતી સમય બગડે છે અને સાથે જ વાહનોના બળતણનો આર્થિક ભાર પણ સહન કરવો પડે છે. રેલવે તંત્રની આ ઉદાસીનતા સામે સ્થાનિક ખેડૂતોમાં રોષ પ્રકટી રહ્યો છે.

પોંસરા ગામના ખેડૂતોએ માંગણી કરી હતી કે રેલવે તંત્ર દ્વારા તાત્કાલિક ધોરણે સ્થળ તપાસ કરી બંને અંડરપાસમાં પાવરફુલ મોટર મૂકીને ભરાયેલા પાણીનો નિકાલ કરી અંડરપાસ વાહનવ્યવહાર માટે ખુલ્લા કરાવવામાં આવે તે જરૂરી છે.

ગુજરાતના વધુ સમાચાર વાંચવા માટે ક્લિક કરો