પંચમહાલ જિલ્લાના ચેરાપુંજી તરીકે ઓળખાતા જાંબુઘોડા પંથકમાં મેઘમહેર યથાવત રહેવા પામી છે. છેલ્લા કેટલાક દિવસોથી જાંબુઘોડા સહિત સમગ્ર પંચમહાલ જિલ્લામાં વરસાદી માહોલ જોવા મળી રહ્યો છે ત્યારે રવિવારે પણ જાંબુઘોડામાં વરસાદે હાજરી પુરાવી હતી. 13 સપ્ટેમ્બરના રોજ સવારે 6થી સાંજે 4 વાગ્યા સુધીમાં જાંબુઘોડા તાલુકામાં 25 મી.મી. એટલે કે આશરે એક ઈંચ વરસાદ નોંધાયો હતો. પંચમહાલ જિલ્લામાં આજના વરસાદના આંકડામાં જાંબુઘોડા પ્રથમ ક્રમે રહ્યું હતું.
જાંબુઘોડા પંથકમાં વરસેલા વરસાદના પગલે વાતાવરણમાં ઠંડક પ્રસરી હતી. વરસાદથી ખેતીવાડી વિસ્તારને પણ રાહત મળતા ધરતીપુત્રોમાં આનંદની લાગણી જોવા મળી હતી. ચોમાસાની ઋતુમાં જાંબુઘોડા પંથકની લીલીછમ પ્રકૃતિ અને જંગલ વિસ્તાર પહેલેથી જ આકર્ષણનું કેન્દ્ર બનતો હોય છે ત્યારે વરસાદ બાદ અહીંના કુદરતી સૌંદર્યમાં ઓર વધારો થયો હતો.