પાટણના શિક્ષણવિદ્ સંશોધક અને ઈનોવેટર ડો. જય ધ્રુવના નામે વધુ એક મહત્વપૂર્ણ સિદ્ધિ નોંધાઈ છે. તેમની નવીન ડિઝાઇન IoT-Based Smart Monitoring Device ને ભારત સરકારના પેટન્ટ કાર્યાલય દ્વારા મંજૂરી આપવામાં આવી છે. ભારત સરકાર દ્વારા આ ડિઝાઇનને ડિઝાઈન નંબર હેઠળ મંજૂરી આપવામાં આવી. નવીન ઉપકરણની ડિઝાઈનનો મુખ્ય ઉદ્દેશ ભવિષ્યની સ્માર્ટ મોનિટરિંગ ટેક્નોલોજી માટે સુવિધાજનક, કોમ્પેક્ટ અને આધુનિક માળખું ઉપલબ્ધ કરાવવાનો છે. વિશિષ્ટ ત્રિકોણાકાર સ્ટેન્ડ, ડિજિટલ ડિસ્પ્લે અને નિયંત્રણ વ્યવસ્થા ધરાવતી આ ડિઝાઇન IoTઆધારિત મોનિટરિંગ સિસ્ટમના વિકાસ માટે ઉપયોગી બની શકે છે. આ પ્રકારની ટેક્નોલોજી દ્વારા તાપમાન, ભેજ, હવાની ગુણવત્તા, વિવિધ સેન્સરનાં માપદંડો તથા ઉપકરણોની કાર્યસ્થિતિ જેવી માહિતીનું રિયલ ટાઈમ મોનિટરિંગ, ડેટા વિશ્લેષણ અને જરૂરિયાત મુજબ એલર્ટ સિસ્ટમ વિકસાવવાની સંભાવના રહેલી છે. ભવિષ્યમાં શિક્ષણ સંસ્થાઓ, વૈજ્ઞાનિક પ્રયોગશાળાઓ, ઔદ્યોગિક એકમો, હોસ્પિટલો, કૃષિ ક્ષેત્ર અને સ્માર્ટ કેમ્પસમાં આવી ટેક્નોલોજી ઉપયોગી બની શકે છે.આ સિદ્ધિ અંગે ડો. જય ધ્રુવે જણાવ્યું હતું કે આજના યુગમાં માત્ર માહિતી મેળવવી પુરતી નથી, પરંતુ માહિતીને યોગ્ય સમયે યોગ્ય નિર્ણયમાં પરિવર્તિત કરવી એ જ સાચી ટેક્નોલોજી છે. ભારતના યુવાનોમાં અભ્દુત સંશોધનશક્તિ અને સર્જનાત્મકતા છે. આપણે માત્ર વિદેશી ટેક્નોલોજીના ઉપયોગકર્તા નહીં. પરંતુ વિશ્વ માટે નવી ટેક્નોલોજીના સર્જક બનવાની દિશામાં આગળ વધવું જોઈએ. વધુમાં જણાવ્યું કે, ક્ષ્આત્મનિર્ભર ભારત અને સમૃદ્ધ ભારત 2027 નું સ્વપ્ન સાકાર કરવા માટે સ્વદેશી સંશોધન, નવીન ડિઝાઈન અને ટેક્નોલોજી આધારિત ઉકેલો વિકસાવવાનું અત્યંત જરૂરી છે. દરેક નવી શોધ માત્ર વ્યક્તિગત સિદ્ધિ નહીં. પરંતુ રાષ્ટ્રની વૈજ્ઞાનિક ક્ષમતાને મજબૂત બનાવવાની દિશામાં એક પગલું છે.

ગુજરાતના વધુ સમાચાર વાંચવા માટે ક્લિક કરો