એન્ફોર્સમેન્ટ ડિરેક્ટોરેટ (ED) દ્વારા આજે દેશભરમાં સરકારી નોકરીના નામે આચરવામાં આવતી ઠગાઈના મોટા કૌભાંડનો પર્દાફાશ કરવા માટે સર્ચ ઓપરેશન હાથ ધરવામાં આવ્યું છે. રાજકોટ સહિત દેશના 6 રાજ્યોમાં કુલ 15 સ્થળોએ EDની ટીમો ત્રાટકી છે. આ તપાસમાં રાજકોટ, ગોરખપુર, ઈલાહાબાદ, લખનૌ, બિહારના મુઝફ્ફરપુર અને મોતિહારી તેમજ કોલકાતા, ચેન્નઈ અને કેરળના વિવિધ લોકેશનનો સમાવેશ થાય છે. આ ગેંગ દ્વારા રેલવે સહિત 10 જેટલા સરકારી વિભાગોમાં ભરતીના નામે નિર્દોષ બેરોજગારો સાથે કરોડોની છેતરપિંડી કરવામાં આવી હોવાનું સામે આવ્યું છે.
દેશના 15 સ્થળોએ EDનું સર્ચ ઓપરેશન
આ ઠગ ગેંગની કાર્યપદ્ધતિ જોઈને અધિકારીઓ પણ ચોંકી ગયા છે. લોકોને વિશ્વાસમાં લેવા માટે આરોપીઓ સરકારી વિભાગો જેવા જ દેખાતા ખોટા ઈમેલ આઈડી બનાવીને નકલી કોલ લેટર અને નિયુક્તિ પત્રો મોકલતા હતા. એટલું જ નહીં, કોઈને શંકા ન જાય તે માટે તેઓ કેટલાક ભોગ બનનાર ઉમેદવારોના બેંક ખાતામાં બે-ત્રણ મહિના સુધી 'પગાર' પણ જમા કરાવતા હતા. આ નકલી પગારની પદ્ધતિને કારણે લોકો છેતરાઈ જતા અને વધુ નાણાં ગુમાવતા હતા. હાલમાં EDએ ડિજિટલ પુરાવા અને દસ્તાવેજો જપ્ત કરી આ મની લોન્ડરિંગના તાર ક્યાં સુધી જોડાયેલા છે તેની તપાસ તેજ કરી છે.