રાજકોટમાં નિવૃત્ત શિક્ષક દંપતીને ટાર્ગેટ બનાવી 1.14 કરોડની છેતરપિંડી આચરનાર 'ડિજિટલ અરેસ્ટ' ગેંગનો પોલીસે પર્દાફાશ કર્યો છે. રાજકોટ સાયબર ક્રાઇમ પોલીસે આ મામલે હરિયાણાથી એક ખાનગી બેંકના સેલ્સ ઓફિસર સહિત બે મુખ્ય આરોપીઓની ધરપકડ કરી છે. આ સાથે આ હાઈપ્રોફાઈલ કેસમાં અત્યાર સુધીમાં કુલ 16 આરોપીઓ જેલના સળિયા પાછળ ધકેલાઈ ગયા છે.
બેંક મેનેજર જ નીકળ્યો માસ્ટરમાઈન્ડ
તપાસમાં બહાર આવ્યું છે કે, હરિયાણાની યસ બેંક (Yes Bank) માં સેલ્સ મેનેજર તરીકે ફરજ બજાવતો શુભમ રઘુવીરસિંહ આ ફ્રોડમાં મુખ્ય ભૂમિકા ભજવતો હતો. તેણે જ બેંકના નીતિ-નિયમોનો દુરુપયોગ કરી અન્ય આરોપી શંકર રાજપુતના નામે બોગસ રીતે બેંક ખાતું ખોલ્યું હતું. આ ખાતામાં જ છેતરપિંડીની ₹1 કરોડથી વધુની રકમ ટ્રાન્સફર કરવામાં આવી હતી. પોલીસે હરિયાણામાં દરોડો પાડી શુભમ અને શંકર રાજપુત બંનેને ઝડપી લીધા છે.
