રાજકોટ અને ગોંડલમાં રોકાણના નામે રાતોરાત અમીર બની જવાની લાલચમાં વધુ એક મોટું કૌભાંડ પ્રકાશમાં આવ્યું છે. ગોંડલના રહેવાસી દિવ્યેશ સાવલિયા અને તેની પત્ની નીલમ સાવલિયાએ પોતાની ‘કામ્યા ટેક્સટાઇલ પ્રાઇવેટ લિમિટેડ’ કંપનીમાં રોકાણ કરવા માટે માર્કેટમાં મોટી જાળ બિછાવી હતી. આ દંપતીએ શેરબજારમાં રોકાણ અને ટેક્સટાઇલ ઉદ્યોગમાં જંગી નફાની વાત કરી સ્થાનિક રોકાણકારો પાસેથી કરોડો રૂપિયા પડાવી લીધા હોવાની ફરિયાદ રાજકોટ બી ડિવિઝન પોલીસ મથકે નોંધાઈ છે.
શરૂઆતમાં વિશ્વાસ જીત્યો બાદમાં મોટો હાથ માર્યો
પોલીસ મથકે નોંધાયેલી વિગતો મુજબ, ફરિયાદી જલ્પાબેન રૈયાણી અને તેમના આખા મિત્ર વર્તુળ (ગ્રુપ) ને આ દંપતીએ પોતાની સ્કીમ સમજાવી હતી. રોકાણકારોનો વિશ્વાસ જીતવા માટે આરોપી દંપતીએ શરૂઆતના થોડા મહિના સુધી રોકાણ કરેલી રકમ પર 2 થી 3 ટકા જેટલું નિયમિત વળતર ચૂકવ્યું હતું. આ વળતર જોઈને જલ્પાબેન અને તેમના ગ્રુપે વધુ કમાણીની લાલચમાં આવીને મોટી રકમનું રોકાણ કરી દીધું હતું. જોકે, જેમ જંગી રકમ ભેગી થઈ કે તરત જ આરોપી દિવ્યેશ અને નીલમ સાવલિયાએ વળતર આપવાનું બંધ કરી દીધું હતું અને મુદલ રકમ પણ ઓળવી ગયા હતા.
