રાજકોટ શહેરમાંથી સોની બજારના વેપારીઓને સતર્ક કરતો એક કિસ્સો સામે આવ્યો છે. શહેરના કોઠારીયા સોલ્વેન્ટ વિસ્તારમાં આવેલી એક સોના-ચાંદીના દાગીનાની દુકાનમાં ચોરી કરવાનો પ્રયાસ નિષ્ફળ રહ્યો છે. દુકાનદારની સતર્કતાના કારણે ચાંદીના દાગીનાની ચોરી કરવા આવેલી ત્રણ મહિલાઓ કોઈ મોટી હાથફેરો કરે તે પહેલાં જ રંગેહાથ ઝડપાઈ ગઈ હતી. વેપારીઓને ચૂનો ચોપડતી આ મહિલાઓની સમગ્ર કરતૂત દુકાનમાં લાગેલા સીસીટીવી કેમેરામાં કેદ થઈ ગઈ છે.
શુભમ પાર્ક પાસે રામનાથ જ્વેલર્સમાં બની ઘટના
આ ઘટના કોઠારીયા સોલ્વેન્ટ વિસ્તારમાં આવેલા શુભમ પાર્ક સોસાયટી પાસે બની હતી. અહીં આવેલી 'રામનાથ જ્વેલર્સ' નામની દુકાનમાં ગ્રાહકના સ્વાંગમાં ત્રણ મહિલાઓ ખરીદી કરવાના બહાને ઘૂસી હતી. દુકાનદાર જ્યારે દાગીના બતાવવામાં વ્યસ્ત હતો, ત્યારે આ મહિલાઓએ નજર ચૂકવીને ચાંદીના કિંમતી ઘરેણાં ચોરી છૂપાવી લેવાનો પ્રયાસ કર્યો હતો. જોકે, મહિલાઓ પોતાની આ ગર્ભિત કળામાં સફળ થાય તે પહેલાં જ વેપારીની નજરે ચડી ગઈ હતી.
