પતંગ અને માંજા માટે આખા રાજ્યમાં પ્રખ્યાત સુરતનું ડબગરવાડ પતંગ બજાર હાલ ઉતરાયણના રંગમાં રંગાયું છે. મકરસંક્રાંતિના પર્વને હવે ગણતરીના દિવસો જ બાકી રહ્યા છે, ત્યારે પતંગ રસિકો મોટી સંખ્યામાં ખરીદી માટે ઉમટી પડ્યા છે. જોકે, આ વર્ષે પતંગના ભાવમાં ગત વર્ષની સરખામણીએ નોંધપાત્ર વધારો જોવા મળી રહ્યો છે.
કમોસમી વરસાદના કારણે પતંગ ઉત્પાદકોને ભારે મુશ્કેલી પડી
આ વર્ષે દિવાળી બાદ પડેલા કમોસમી વરસાદના કારણે પતંગ ઉત્પાદકોને ભારે મુશ્કેલી પડી હતી. પતંગ બનાવવા માટે વપરાતા કાગળ અને વાંસની સળીઓમાં ભેજ લાગવાને કારણે ઉત્પાદન ખર્ચ વધ્યો છે. જેના પરિણામે બજારમાં પતંગના ભાવમાં 10 થી 20 ટકાનો વધારો નોંધાયો છે. તેમ છતાં, સુરતીઓનો ઉત્સાહ ઓછો થયો નથી. પતંગ રસિકોનું કહેવું છે કે, "ભાવ ભલે વધ્યા, પણ સુરતીઓ પતંગ ચગાવવાનું તો નહીં જ છોડે."
