Surat: સિવિલ હોસ્પિટલને સાંસદ મુકેશ દલાલની ગ્રાન્ટમાંથી E-વ્હીકલ ભેટ

સુરતની નવી સિવિલ હોસ્પિટલમાં સારવાર અર્થે આવતા હજારો દર્દીઓની સુવિધામાં વધારો કરવા માટે સુરતના સાંસદ મુકેશ દલાલની ગ્રાન્ટમાંથી એક બેટરી ઓપરેટેડ E-વ્હીકલ (ઇ-વહિકલ) આપવામાં આવ્યું છે.

નવી સિવિલ હોસ્પિટલને E-વહિકલ આપવામાં આવ્યું 

નવી સિવિલ હોસ્પિટલ માત્ર સુરત જ નહીં પરંતુ સમગ્ર દક્ષિણ ગુજરાતના લોકો માટે સ્વાસ્થ્યનું મુખ્ય કેન્દ્ર છે. અહીં દરરોજની 5000થી વધુની OPD નોંધાય છે. હોસ્પિટલના વિશાળ પરિસરમાં દર્દીઓ અને તેમના સગાં-સંબંધીઓને ઘણી વખત એક સ્થળેથી બીજા સ્થળે જવા માટે હાલાકી ભોગવવી પડતી હતી. આ મુશ્કેલીને દૂર કરવા માટે લોકો તરફથી બેટરી ઓપરેટેડ ઇ-વ્હીકલ આપવાની માંગ હતી.

દર્દીઓને સરળતાથી હોસ્પિટલમાં અવરજવર

સાંસદ મુકેશ દલાલે આ માંગને ધ્યાનમાં રાખીને એક E-વ્હીકલ હોસ્પિટલને અર્પણ કર્યું છે. આ ઇ-વ્હીકલમાં દર્દી માટે મેટ (સ્ટ્રેચર જેવી વ્યવસ્થા) અને દર્દીના સગા માટે બે સીટની વ્યવસ્થા પણ છે, જેના કારણે દર્દીઓને સરળતાથી હોસ્પિટલમાં અવરજવર કરાવી શકાશે. સાંસદે ખાતરી આપી છે કે આગામી દિવસોમાં હોસ્પિટલને વધુ એક બેટરી ઓપરેટેડ E-વ્હીકલ આપવામાં આવશે, જેમાં માત્ર દર્દીના સગા-સંબંધીઓ બેસીને અવરજવર કરી શકશે. આ સુવિધાથી દર્દીઓ અને તેમના પરિવારજનોને મોટી રાહત મળશે.