આંતરરાષ્ટ્રીય સ્તરે યુદ્ધની જે પરિસ્થિતિ નિર્માણ પામી છે, તેની સીધી અને નકારાત્મક અસર હવે સુરતના એવિએશન સેક્ટર (ઉડ્ડયન ઉદ્યોગ) પર જોવા મળી રહી છે. સુરત ઇન્ટરનેશનલ એરપોર્ટ પરથી વિદેશ યાત્રા કરનારા મુસાફરોની સંખ્યામાં એપ્રિલ મહિના દરમિયાન અભૂતપૂર્વ ઘટાડો નોંધાયો છે. મધ્ય-પૂર્વ (Middle East) માં વધતા જતા યુદ્ધના કારણે સુરતથી ઓપરેટ થતી મુખ્ય આંતરરાષ્ટ્રીય ફ્લાઈટો અટકી પડી છે, જેના લીધે પ્રવાસીઓનો ગ્રાફ ચિંતાજનક રીતે નીચે આવ્યો છે.
જાન્યુઆરીની સરખામણીએ એપ્રિલમાં ટ્રાફિક તળિયે
સુરત એરપોર્ટના સત્તાવાર આંકડાઓ પર નજર કરીએ તો, ચાલુ વર્ષના જાન્યુઆરી મહિનામાં સુરતથી રેકોર્ડબ્રેક ૨૩,૬૦૦ જેટલા પ્રવાસીઓએ વિદેશની ધરતી પર પ્રવાસ ખેડ્યો હતો. જો કે, ત્યાર બાદ યુદ્ધની સ્થિતિ વધુ વણસતાં એરલાઇન્સ કંપનીઓએ સુરક્ષાના કારણોસર મોટો નિર્ણય લીધો હતો. પરિણામે, એપ્રિલ મહિનામાં આ આંકડો ભારે પછડાટ સાથે માત્ર ૪,૧૧૪ પ્રવાસીઓ પર આવીને અટકી ગયો છે. એટલે કે માત્ર ત્રણ જ મહિનાના ગાળામાં આંતરરાષ્ટ્રીય પેસેન્જરોની સંખ્યામાં મોટો ઘટાડો નોંધાયો છે.