ઉમરપાડા તાલુકાની સીમમાં આવેલી સરકારી જંગલની જમીન પર બિનઅધિકૃત કબજો જમાવવાના ષડયંત્રો સામે આવતા બે જિલ્લાઓ વચ્ચેનો જમીન વિવાદ ફરી એકવાર વકર્યો છે. નર્મદા જિલ્લાના સાગબારા તાલુકા હેઠળ આવતા ખોપી ગામના કેટલાક તત્ત્વો કોઇપણ પ્રકારના માન્ય પુરાવા કે સત્તાવાર આધાર વગર ઉમરપાડાનાં ગાઢ વનવિસ્તારમાં ઘૂસણખોરી કરી રહ્યા છે.
આ શખ્સો વન વિભાગ દ્વારા ઉછેરવામાં આવેલા નવા રોપાઓને મોટું નુકસાન પહોંચાડી બળજબરીપૂર્વક જમીન ખેડવાનો કારસો રચી રહ્યા હોવાનો ગંભીર આક્ષેપ સ્થાનિક આદિવાસી સમાજ દ્વારા કરવામાં આવ્યો છે. હરિપુરા ગામના સ્થાનિક ખેડૂતો, પશુપાલકો અને મોટી સંખ્યામાં ઉપસ્થિત મહિલાઓએ આ સમગ્ર મામલે ભારે રોષ વ્યક્ત કર્યો છે. સ્થાનિકોના જણાવ્યા અનુસાર, અગાઉ સરકારે માત્ર કાયદેસર અને માન્ય દસ્તાવેજોની ચકાસણી કરીને જ સનદો એનાયત કરવાની જાહેરાત કરી હતી, જેના પગલે આંદોલન સમેટાઇ ગયું હતું. જોકે, આ સમાધાન બાદ પણ કેટલાક તત્ત્વો ખોટા દાવા ઊભા કરીને મૂલ્યવાન જંગલ જમીન પચાવી પાડવાનાં પેંતરા રચી રહ્યા છે. આટલું જ નહીં, પોતાની ગેરકાયદે હિલચાલ ચાલુ રાખવા માટે તેઓ ફરજ પર તૈનાત વન કર્મચારીઓ સાથે પણ અવારનવાર ઘર્ષણમાં ઉતરી રહ્યા છે. આ સંવેદનશીલ વિવાદ હવે સ્થાનિક આદિવાસી પરિવારો માટે સીધો અસ્તિત્ત્વનો પ્રશ્ન બની ચૂક્યો છે, કારણ કે ઉમરપાડાની આ જંગલ જમીન પર સ્થાનિક આદિવાસીઓનો વર્ષો જૂનો પરંપરાગત અધિકાર રહ્યો છે. હરિપુરા ઉપરાંત મોટી દેવરૂપણ, જોડવાણ અને મૌલીપાડા જેવા આસપાસનાં ગામોના સેંકડો પરિવારો જંગલમાંથી પૂરતો ઘાસચારો મેળવીને પશુપાલન થકી પોતાનું જીવનનિર્વાહ ચલાવે છે. જો બહારના લોકો દ્વારા આ જમીન પર ગેરકાયદે ખેતી કરી દેવામાં આવશે, તો સમૃદ્ધ કુદરતી વનરાજી સાવ નષ્ટ થઇ જશે અને સ્થાનિક ગ્રામીણો પાસેથી રોજગારી તેમજ પશુપાલનનો મુખ્ય આધાર છીનવાઇ જશે. જેથી ખોટા ધરણા અને પ્રદર્શનો કરી તંત્રને ગેરમાર્ગે દોરતા સાગબારાના આ તત્ત્વો સામે વન વિભાગ તાત્કાલિક ધોરણે આકરી કાનૂની કાર્યવાહી હાથ ધરે તેવી લોકલાગણી સાથે ઉગ્ર માંગ ઉઠી છે.