સુરત શહેરના સચિન GIDC વિસ્તારમાં આવેલી હોજીવાલા ઇન્ડસ્ટ્રીયલ એસ્ટેટમાં લાગેલી ભીષણ આગ હજુ પણ યથાવત છે. ગોપીનાથ ટેક્સટાઇલ મિલમાં લાગેલી આ આગને બે કલાકથી વધુનો સમય વીતી ગયો હોવા છતાં સ્થિતિ હજુ કાબૂમાં આવી નથી. ફાયર વિભાગના ઉચ્ચ અધિકારીઓ અને અનેક ફાયર ફાઈટરો ઘટના સ્થળે આગ પર કાબૂ મેળવવા સતત પાણીનો મારો ચલાવી રહ્યા છે.
રજા હોવાથી મોટી જાનહાનિ ટળી
સૌથી રાહતની વાત એ છે કે, આજે મિલમાં રજાનો દિવસ હોવાથી અંદર કામદારોની હાજરી નહિવત હતી. જો મિલ ચાલુ હોત તો મોટી જાનહાનિ થવાની ભીતિ હતી. હાલમાં મિલના બિલ્ડિંગમાંથી કાળા ધુમાડાના ગોટેગોટા નીકળી રહ્યા છે, જે દૂર-દૂર સુધી જોઈ શકાય છે. આગ એટલી વિકરાળ છે કે આજુબાજુની કંપનીઓને પણ સાવચેતીના ભાગરૂપે એલર્ટ કરી દેવામાં આવી છે.