સોના પરની આયાત ડ્યુટ વધવાના કારણે દેશભરના સોના-ચાંદીના બજારમાં ચિંતાનો માહોલ જોવા મળી રહ્યો છે. આ પરિસ્થિતિ વચ્ચે ડાયમંડ અને ગોલ્ડ સિટી તરીકે ઓળખાતા સુરતમાં 'સુરત જ્વેલર્સ એસોસિએશન' દ્વારા એક અત્યંત તાકીદની અને મહત્વની બેઠક યોજવામાં આવી હતી. આ બેઠકમાં મોટી સંખ્યામાં સ્થાનિક જ્વેલર્સ અને શો-રૂમના સંચાલકો હાજર રહ્યા હતા અને વર્તમાન આર્થિક સ્થિતિ અંગે ઊંડી ચર્ચા-વિચારણા હાથ ધરી હતી.
વડાપ્રધાનની અપીલને સમર્થન
બેઠકમાં હાજર તમામ વેપારીઓએ એકસૂરે વડાપ્રધાન નરેન્દ્ર મોદીની અપીલને ઉષ્માભર્યું સમર્થન જાહેર કર્યું હતું. એસોસિએશને સ્પષ્ટ કર્યું કે વડાપ્રધાન દેશહિત માટે જ કોઈ પણ મોટો નિર્ણય લેતા હોય છે ત્યારે દેશના અર્થતંત્રને મજબૂત કરવા માટે સરકાર પાસે ચોક્કસ રોડમેપ તૈયાર હશે. આ મુશ્કેલ સમયમાં સુરતના જ્વેલર્સે 'દેશ અને રાષ્ટ્ર પ્રથમ'ની ભાવના સાથે સરકારના તમામ નિયમોને અનુસરવા અને સહકાર આપવા માટેની સંપૂર્ણ તૈયારી દર્શાવી છે.