સુરત શહેરમાંથી કૌટુંબિક વિવાદ અને માનસિક ત્રાસનો એક અત્યંત ચોંકાવનારો કિસ્સો સામે આવ્યો છે. શહેરના રહીશ કિરીટ પટેલે પોતાની પત્નીના અસહ્ય ત્રાસથી કંટાળીને જિલ્લા કલેક્ટરને લેખિત અરજી કરી ઈચ્છામૃત્યુની (Euthanasia) માંગણી કરતાં સમગ્ર વહીવટી તંત્ર અને પંથકમાં ભારે ચકચાર મચી ગઈ છે. કિરીટ પટેલે આક્ષેપ કર્યો છે કે કાયદાકીય સહાય ન મળવાને કારણે તેઓ આ આત્યંતિક પગલું ભરવા માટે મજબૂર બન્યા છે.
મહિલાલક્ષી કાયદાના દુરુપયોગ અને ખોટા કેસોનો આક્ષેપ
પીડિત કિરીટ પટેલના જણાવ્યા અનુસાર, તેમની પત્ની મનીષા ચૌહાણ મહિલા સુરક્ષા માટે બનેલા કાયદાઓનો દુરુપયોગ કરીને તેમને અલગ-અલગ પ્રકારે માનસિક અને શારીરિક ત્રાસ આપી રહી છે. કિરીટ પટેલે ગંભીર આક્ષેપ કરતાં કહ્યું કે, પત્ની પહેલાં તેમની સાથે મારપીટ કરીને ઉશ્કેરણી કરે છે અને ત્યારબાદ જો સામો પ્રતિકાર કરવામાં આવે તો ૧૮૧ મહિલા હેલ્પલાઇન પર ફોન કરીને તેમની સામે જ ગુનો દાખલ કરાવી દે છે. પત્ની દ્વારા કરવામાં આવેલા ખોટા કેસોને કારણે તેમને સતત કોર્ટ-કચેરીના ધક્કા ખાવા પડી રહ્યા છે.
