વડોદરા શહેરમાં જોખમી સ્ટંટ કરીને સોશિયલ મીડિયા પર 'રિલ' બનાવવાનો ક્રેઝ પોલીસ અને કાયદાને ખુલ્લો પડકાર ફેંકી રહ્યો છે. શહેરના આજવા રોડ પર ફરી એકવાર યુવકોએ ખુલ્લેઆમ જોખમી સ્ટંટ કરીને સુરક્ષા વ્યવસ્થાની હાંસી ઉડાવી છે.
આજવા રોડ પર જોખમી સ્ટંટ
આ ઘટના આજવા રોડ પર પંડિત દીનદયાળ નગર ગ્રુપ નજીક આવેલા એક ખુલ્લા મેદાનમાં બની હતી. આ મેદાન મુખ્ય રોડ અને રહેણાંક વિસ્તારને અડીને આવેલું હોવા છતાં યુવકોએ બેફામ બનીને સ્ટંટ કર્યા હતા. સૌથી વધુ ચોંકાવનારી બાબત એ છે કે સ્ટંટ કરનારા રિલબાજોએ એક સાથે ત્રણ જુદા-જુદા વાહનો – બાઇક, કાર અને પિકઅપ ડાલા (ગુડ્સ વાહન)નો ઉપયોગ કરીને જોખમી સ્ટંટ કર્યા હતા. આ યુવકોએ બાઇક અને કારના સ્ટંટ બાદ હવે ભારવાહક વાહનોનો ઉપયોગ કરીને પોલીસને ફરી એકવાર પડકાર ફેંક્યો છે.
