સંસ્કારી નગરી વડોદરામાં છેલ્લા કેટલાક સમયથી અચાનક આવતા હાર્ટ એટેકનું પ્રમાણ ભયજનક રીતે વધી રહ્યું છે. ખાસ કરીને ચાલુ વાહને હાર્ટ એટેક આવવાની વધતી ઘટનાઓએ વાહનચાલકો અને તંત્રમાં ફફડાટ ફેલાવી દીધો છે. આવી જ એક હૃદયદ્રાવક ઘટનામાં, એક 50 વર્ષીય રિક્ષાચાલકનું ચાલુ રિક્ષાએ હાર્ટ એટેક આવતા કરુણ મોત નીપજ્યું છે.
રિક્ષા હંકારતા આવ્યો હાર્ટ એટેક
મળતી માહિતી પ્રમાણે શહેરના ભરચક માર્ગ પર જ્યારે આ રિક્ષાચાલક પોતાની રોજગારી માટે રિક્ષા હંકારી રહ્યા હતા, ત્યારે કાળ બનીને આવેલા હાર્ટ એટેકે તેમને સંભળવાનો મોકો પણ ન આપ્યો. 50 વર્ષની વયના આ પ્રૌઢને ચાલુ રિક્ષાએ છાતીમાં તીવ્ર દુખાવો ઉપડ્યો અને જોતજોતામાં રિક્ષાના સ્ટીયરિંગ પર જ તેઓ ઢળી પડ્યા હતા. આસપાસના લોકો અને રાહદારીઓ મદદ માટે દોડે તે પહેલા જ તેમનું ઘટનાસ્થળે નિધન થયું હતું. આ દ્રશ્ય એટલું આઘાતજનક હતું કે ત્યાં હાજર સૌ કોઈ સ્તબ્ધ થઈ ગયા હતા.