વડોદરાના રાવપુરા વિસ્તારના વોર્ડ નંબર 2 અને 7 માં કોન્ટ્રાક્ટર દ્વારા કરવામાં આવેલા રોડ અને ગટરના કામમાં થયેલી બેદરકારી સામે સ્થાનિક નાગરિકોમાં ભારે રોષ જોવા મળી રહ્યો છે. રોડ બનાવ્યા બાદ પણ આજુબાજુના ખાડાઓ યથાવત રહેતા રહીશોમાં આક્રોશ ફેલાયો છે.
રાવપુરામાં કોન્ટ્રાક્ટરની બેદરકારી સામે રોષ
સ્થાનિકોના જણાવ્યા મુજબ, કોન્ટ્રાક્ટરે માત્ર રોડ બનાવીને સંતોષ માન્યો છે, પરંતુ રોડની બંને બાજુના ખાડા પૂરવામાં બેદરકારી દાખવી છે. આનાથી પણ વધુ ગંભીર બાબત એ છે કે રોડ બન્યા બાદ બે-બે વખત ગટરની કામગીરી કરવામાં આવી છે. પહેલાં રોડ બનાવ્યો, પછી ગટરો ખોલવામાં આવી. આ કામગીરી માટે ગટરો ખોલીને કપચી અને ડામરથી મરામત કરવામાં આવી હતી. જોકે, કોન્ટ્રાક્ટરના કર્મચારીઓએ ફરીથી ડામર ઉખેડી નાખીને તે જગ્યાએ સિમેન્ટ પાથર્યો હોવાનો આક્ષેપ છે. આ પ્રકારની વારંવારની અને અવ્યવસ્થિત કામગીરીને કારણે સરકારી તિજોરીનો અને નાગરિકોના સમયનો વ્યય થયો છે.
