વડોદરા જિલ્લાના શિનોર પંથકમાં અસામાજિક તત્વો અને તસ્કરો બેફામ બન્યા છે. શિનોર પોલીસને ખુલ્લો પડકાર ફેંકતા હોય તેમ, તસ્કરોએ સાધલી ગામમાં આવેલી એક સેલ્ફ-ફાઇનાન્સ શાળાને નિશાન બનાવી લાખો રૂપિયાની ચોરી કરી છે. સાધલી-ઉતરાજ મેઇન ધોરીમાર્ગ પર આવેલી મનન વિદ્યાલયમાં ગત રાત્રે 1 વાગ્યાને 9 મિનિટે તસ્કરો ત્રાટક્યા હતા. ત્રણ જેટલા તસ્કરોએ શાળાની એકાઉન્ટ ઓફિસને નિશાન બનાવી હતી અને ડ્રોવરમાં રાખેલા રૂ. 4,37,000/- (ચાર લાખ સાડત્રીસ હજાર) ની રોકડ રકમની ચોરી કરી હતી. આ રકમ વિદ્યાર્થીઓની શિક્ષણ ફી, યુનિફોર્મ વગેરેના હતા.
મનન વિદ્યાલયમાં તસ્કરો ત્રાટક્યા
તસ્કરોએ ચોરીનો અંજામ આપતી વખતે ઓફિસમાં લાઈટો સળગાવી રાખી હતી અને જાણે કે તેમને પોલીસનો કોઈ ડર ન હોય તેમ બેખોફ રીતે ચોરીને પાર પાડી હતી. નવાઈની વાત એ છે કે, તસ્કરોએ ઓફિસમાં રહેલા મોબાઇલ અને લેપટોપને રહેવા દીધા હતા અને માત્ર રોકડ રકમ જ લઈને ફરાર થઈ ગયા હતા. ચોરીની આ સમગ્ર ઘટના CCTV કેમેરામાં કેદ થઈ છે.
