વડોદરાની નગર પ્રાથમિક શિક્ષણ સમિતિની શાળાઓને લગતા એક અભ્યાસમાં 86% આચાર્યોનું માનવું છે કે, નો-ડિટેન્શન પોલિસીના કારણે બાળકોમાં શિક્ષણ પ્રત્યેની ગંભીરતા ઘટી રહી છે. અલબત્ત, આ સાથે એ પણ મહત્વનું છે કે બાળકને નાપાસ ન કરવું માત્ર પૂરતું નથી; તેની શૈક્ષણિક ક્ષમતાનું સતત મૂલ્યાંકન અને લર્નિગ ગેપ દૂર કરવાની વ્યવસ્થા પણ એટલી જ જરૂરી છે.
એમ.એસ. યુનિવર્સિટીની ફેકલ્ટી ઓફ્ સોશિયલ વર્કના માસ્ટર્સના વિદ્યાર્થી પિયુષ બાબરિયાએ ફેકલ્ટીના અધ્યાપક ડો. શર્મિષ્ઠા સોલંકીના માર્ગદર્શન હેઠળ કરેલા અભ્યાસમાં શિક્ષણ સમિતિની 121 શાળાઓના આચાર્યો કે હેડ શિક્ષકોના અભિપ્રાયો મેળવ્યાં હતા.