વડોદરાના અકોટા વિસ્તારમાં એક યુવકને જાહેરમાં માર મારવાનો અને તાલિબાની સજા આપતો વીડિયો વાયરલ થયો હતો. આ વીડિયોની ગંભીરતાને ધ્યાનમાં લઈને અકોટા પોલીસે તપાસનો ધમધમાટ શરૂ કર્યો હતો અને ગણતરીના કલાકોમાં જ હુમલો કરનાર બે શખ્સોને દબોચી લીધા હતા. પોલીસ તપાસમાં જે વિગતો સામે આવી છે તે ચોંકાવનારી છે.
વાયરલ વીડિયો બાદ પોલીસે કરી કાર્યવાહી
ભોગ બનનાર અને હુમલો કરનાર બંને પક્ષો બાળપણના મિત્રો છે. જોકે, કોઈ બાબતે તેમની વચ્ચે ગેરસમજ ઊભી થઈ હતી, જેના કારણે આવેશમાં આવીને અન્ય બે યુવકોએ તેમના જ મિત્રને ઢોર માર મારીને ક્રૂર સજા આપી હતી. આ ઘટનાનો વીડિયો સોશિયલ મીડિયા પર વહેતો થતા લોકોમાં રોષ જોવા મળ્યો હતો. આશ્ચર્યજનક રીતે, ભોગ બનનાર યુવકે પોતાના જ મિત્રો હોવાને કારણે ફરિયાદ કરવાની ના પાડી હતી.
