વલસાડ જિલ્લાના વાપી રેલવે સ્ટેશન પરથી માનવતા અને સમયસૂચકતાના ઉત્તમ ઉદાહરણ સમાન બે અલગ-અલગ ઘટનાઓ સામે આવી છે. ચાલુ ટ્રેનમાં ચઢવા અને ઉતરવા જતાં બે જુદા-જુદા મુસાફરોનો પગ લપસી ગયો હતો. સંતુલન ગુમાવવાને કારણે બંને મુસાફરો પ્લેટફોર્મ અને ટ્રેનની વચ્ચેના જોખમી ગેપમાં સરકી રહ્યા હતા. જોકે, સ્ટેશન પર હાજર રેલવે સ્ટાફની બહાદુરીને કારણે એક મોટી હોનારત ટળી ગઈ હતી. આ હૃદયધબકારો વધારતી ઘટનાના લાઈવ દ્રશ્યો રેલવે સ્ટેશનના સીસીટીવી (CCTV) કેમેરામાં કેદ થયા છે.
સેકન્ડોના હેરફેરથી બે મુસાફરોના જીવ બચ્યા
મળતી વિગતો અનુસાર, પહેલી ઘટનામાં એક મહિલા મુસાફર ચાલુ ટ્રેનમાંથી ઉતરવાનો પ્રયત્ન કરી રહી હતી, તે સમયે તેનો પગ સ્લીપ થઈ ગયો હતો. મહિલા ટ્રેનની નીચે કચડાય તે પહેલાં જ ત્યાં ફરજ પર હાજર વલસાડના રેલવે સફાઈ કોન્ટ્રાક્ટરે ત્વરિત દોડીને મહિલાને પ્લેટફોર્મ તરફ ખેંચી લીધી હતી. જ્યારે બીજી ઘટનામાં એક પુરુષ મુસાફર ચાલુ ટ્રેનમાં ચઢવા જતાં પોતાનો કાબૂ ગુમાવી બેઠો હતો અને ટ્રેનની સાથે ઢસડાવા લાગ્યો હતો.
