વલસાડ જિલ્લાના કપરાડા તાલુકાના અસ્ટોલ ગામે આજે એક હૃદયદ્રાવક અકસ્માતની ઘટના સામે આવી છે. ગામના કાસ્ટુનીયા ફળિયા નજીકથી પસાર થઈ રહેલો એક ટેમ્પો અચાનક પલટી મારી જતાં ચીચીયારીઓ ગુંજી ઉઠી હતી. આ ટેમ્પોમાં એક જ કુટુંબના સભ્યો સવાર હતા, જેઓ ઘરે પ્રસંગ હોવાથી લગ્નની ખરીદી કરવા માટે ઉત્સાહભેર નીકળ્યા હતા. જોકે, ગંતવ્ય સ્થાને પહોંચે તે પહેલા જ કાળનો પંજો ત્રાટકતા લગ્નની ખુશીઓ માતમમાં ફેરવાઈ ગઈ હતી.
ટેમ્પોમાં 25 લોકો સવાર હતા
મળતી માહિતી મુજબ, આ ટેમ્પોમાં અંદાજે 25 જેટલા લોકો સવાર હતા. અચાનક ટેમ્પો પલટી ખાઈ જતાં અંદર બેઠેલા મુસાફરો નીચે દબાઈ ગયા હતા. આ અકસ્માતમાં 5 થી વધુ લોકોને ગંભીર ઇજાઓ પહોંચી છે, જ્યારે અન્ય લોકોને નાની-મોટી ઈજાઓ થઈ છે. અકસ્માત સર્જાતા જ આસપાસના રહીશો મદદે દોડી આવ્યા હતા અને ટેમ્પો નીચે ફસાયેલા લોકોને બહાર કાઢવાની કામગીરી હાથ ધરી હતી.