નાનાપોંઢાના ઓઝરડા ગામના બે ફળીયાના રહીશો માટે અત્યંત ઉપયોગી કૂવાનું પાણી તળિયે બેસી જતાં, ફળીયાના રહીશોએ પીવાના પાણી માટે વલખા મારવાની નોબત આવી રહી છે. હયાત કૂવામાં માંડ ભેગું થતું હોવાથી બંને ફળીયાના રહીશો ડહોળું પાણી પીવા મજબૂર બન્યા છે.
નાનાપોંઢાના ઓઝરડા ગામના તાડપાડા ફળીયા અને બોરીચમાળ ફળીયામાં પીવાના પાણીની સમસ્યા અત્યંત વિકટ બની ગઈ છે. ફળીયામાં આવેલા કૂવાનું જળસ્તર તળિયે બેસી જતાં, પીવાના પાણીની કટોકટી સર્જાઈ છે. આ બંને ફળીયાના ૧૨૦થી વધુ રહેવાસીઓ કૂવામાં માંડ-માંડ એકત્ર થતું ગંદુ પ્રદૂષિત પાણી પીને તરસ છીપાવવા મજબૂર બન્યા છે. કૂવામાંથી માંડ આવતું પાણી અબોલ જીવો પણ પી શકે તેમ નથી. પીવાના પાણીની વિકટ સમસ્યાથી પીડાતા રહીશો પ્રદૂષિત પાણી પી રહ્યા હોવાથી તેમના આરોગ્ય સામે પણ ગંભીર ખતરો છે. સામાન્ય રીતે જિલ્લામાં ૧૫ જૂનથી ચોમાસાનો પ્રારંભ થઇ જાય છે. ચાલુ વર્ષે ચોમાસું પાછળ ખેંચાય તેવી શક્યતાને પગલે, બંને ફળીયાના રહીશોની હાલત વધુ કફેડી બને તેવી શક્યતાને લઈને ગામના રહીશોમાં ચિંતાની લાગણી ફેલાઈ છે.
