બનાસકાંઠા જિલ્લાના મહત્વના ગણાતા થરાદ મુખ્ય માર્કેટયાર્ડ અને રાહ સબયાર્ડમાં આગામી 26 માર્ચથી હરાજીનું કામકાજ બંધ રાખવાનો નિર્ણય લેવામાં આવ્યો છે. નાણાકીય વર્ષ 2025-26 પૂર્ણ થતું હોવાથી વેપારીઓના હિસાબી કામકાજ અને માર્ચ એન્ડિંગના ક્લોઝિંગને ધ્યાનમાં રાખીને બજાર સમિતિ દ્વારા આ જાહેરાત કરવામાં આવી છે.
રજાનું કારણ અને સમયગાળો
વેપારી મિત્રો દ્વારા માર્ચ એન્ડિંગના હિસાબો પૂર્ણ કરવા માટે રજાની રજૂઆત કરવામાં આવી હતી, જેને બજાર સમિતિએ ગ્રાહ્ય રાખી છે. આ અંતર્ગત 26 માર્ચથી 2 એપ્રિલ 2026 સુધી હરાજીની પ્રક્રિયા સંપૂર્ણપણે બંધ રહેશે. ત્યારબાદ 3 એપ્રિલ 2026 (શુક્રવાર) થી હરાજીનું કામકાજ રાબેતા મુજબ ફરી શરૂ કરવામાં આવશે.
ખેડૂતો અને વેપારીઓ માટે સૂચના
બજાર સમિતિ દ્વારા ખેડૂત ભાઈઓને ખાસ વિનંતી કરવામાં આવી છે કે, હરાજી બંધ હોવાના સમયગાળા દરમિયાન ખેડૂતોએ પોતાનો કૃષિ પાક વેચાણ અર્થે યાર્ડમાં લાવવો નહીં. આ નિર્ણય થરાદ મુખ્ય યાર્ડ અને રાહ સબયાર્ડ એમ બંને કેન્દ્રો પર સમાન રીતે લાગુ પડશે.
વહીવટી કામકાજ ચાલુ રહેશે
હરાજી બંધ હોવા છતાં, જાહેર રજાના દિવસો સિવાય માર્કેટ ઓફિસનું વહીવટી કામકાજ ચાલુ રહેશે. આ નિર્ણયની અસર તમામ વેપારીઓ, ખેડૂતો, મહેતા ભાઈઓ તેમજ હમાલ અને તોલાટ ભાઈઓને થશે. વેપારીઓએ આ સમયગાળા દરમિયાન પોતાના નાણાકીય વર્ષનું ક્લોઝિંગ પૂર્ણ કરવાનું રહેશે.
આ પણ વાંચો: Surat: મિલેનિયમ-1 ટેક્સટાઈલ માર્કેટમાં 23 દિવસમાં બીજી વાર આગનો બનાવ, ગ્રાઉન્ડ ફ્લોરની કાપડની દુકાન બળીને ખાખ
