મહેસાણા જિલ્લાના સુપ્રસિદ્ધ અને શ્રદ્ધાનું કેન્દ્ર એવા યાત્રાધામ બહુચરાજી મંદિરમાં ભક્તો દ્વારા આપવામાં આવેલા દાનનો આંકડો રૂ. 2,25,11,800 (બે કરોડ પચ્ચીસ લાખ અગિયાર હજાર આઠસો રૂપિયા) ને પાર પહોંચી ગયો છે. છેલ્લા દસ દિવસથી ચાલી રહેલી સઘન દાન ગણતરી દરમિયાન આ જંગી રકમ સામે આવી છે.
અઢી વર્ષથી સ્ટોર રૂમમાં રાખેલા દાનની પણ થઈ ગણતરી
મહત્વની વાત એ છે કે, આ દાનની ગણતરીમાં છેલ્લા અઢી વર્ષથી સ્ટોર રૂમમાં સુરક્ષિત રાખવામાં આવેલી દાનપેટીઓની રકમનો પણ સમાવેશ કરવામાં આવ્યો છે. લાંબા સમયથી એકત્રિત થયેલું આ દાન ભારે જહેમત અને પારદર્શક પદ્ધતિથી ગણવામાં આવી રહ્યું છે.
સીસીટીવી કેમેરા અને અધિકારીઓની દેખરેખ હેઠળ કામગીરી
સમગ્ર દાન ગણતરીની પ્રક્રિયામાં સંપૂર્ણ પારદર્શિતા જળવાઈ રહે તે માટે કલેક્ટર, મામલતદાર, મહેસુલી તલાટી તેમજ સંબંધિત કર્મચારીઓની ઉપસ્થિતિ રહેલી છે. આ ઉપરાંત, સમગ્ર પ્રક્રિયા સીસીટીવી (CCTV) કેમેરાની કડક નજર હેઠળ સતત રેકોર્ડિંગ સાથે હાથ ધરવામાં આવી રહી છે.
દિવાળીના તહેવારને લીધે ગણતરી અસ્થાયી રૂપે સ્થગિત
દિવાળીના પાવન તહેવારો અને રજાઓની પૂર્વસંધ્યાએ રવિવારથી દાનની ગણતરી કામગીરી હાલ પૂરતી બંધ રાખવાનો મહત્વનો નિર્ણય લેવામાં આવ્યો છે. તહેવારો અને દિવાળીના દિવસો પૂર્ણ થયા બાદ આગામી દિવસોમાં રોકડ દાનની આ ગણતરી ફરીથી ઉત્સાહભેર શરૂ કરવામાં આવશે.
આ પણ વાંચો: Mahesana : PM સૂર્યઘર યોજના હેઠળ પરિવારોને મળશે વીજળી ખર્ચમાં મોટી રાહત
