પાટણ જિલ્લાના ચાણસ્મા તાલુકાના બ્રાહ્મણવાળા રોડ પર અત્યંત કરુણ માર્ગ અકસ્માતની ઘટના સામે આવી છે, જેમાં કાયદાના રક્ષક ગણાતા એક પોલીસ કોન્સ્ટેબલની બેફામ ડ્રાઇવિંગને કારણે બે નિર્દોષ લોકોએ જીવ ગુમાવ્યો છે, જ્યારે અન્ય ચાર લોકો ગંભીર રીતે ઘાયલ થયા છે. મળતી માહિતી મુજબ, બહુચરાજી પોલીસ મથકમાં ફરજ બજાવતા પોલીસ કોન્સ્ટેબલ બાબુ ચોધરી પોતાની ખાનગી કાર પુરપાટ અને બેફામ ગતિએ ચલાવી રહ્યા હતા. બ્રાહ્મણવાળા રોડ પર તેમની કારે રોડ પર જઈ રહેલી એક રિક્ષાને જોરદાર ટક્કર (Accident) મારી હતી. ટક્કર એટલી ભયંકર હતી કે રિક્ષાનો કચ્ચરઘાણ નીકળી ગયો હતો.
આ અકસ્માતમાં બે કરૂણ મોત, ચાર ઘાયલ
આ અકસ્માતમાં રિક્ષામાં સવાર બે લોકોનું ઘટનાસ્થળે જ કરૂણ મોત નીપજ્યું હતું, જ્યારે અન્ય ચાર વ્યક્તિઓ ગંભીર રીતે ઘાયલ થઈ હતી. ઘાયલ થયેલા તમામ લોકોને તાત્કાલિક સારવાર માટે નજીકની હોસ્પિટલમાં ખસેડવામાં આવ્યા છે. આ દુર્ઘટનાને પગલે ઘટનાસ્થળે હાજર લોકોના ટોળેટોળાં એકઠા થઈ ગયા હતા અને મૃતકોના પરિવારજનોમાં શોકનું મોજું ફરી વળ્યું છે.
