ગુજરાતમાં આજે કચ્છ અને બનાસકાંઠા જિલ્લામાં વરસાદે તારાજી સર્જી છે. કચ્છમાં ભારે વરસાદને કારણે મેવાસાનો ડેમ તૂટ્યો છે. ડેમમાંથી મોટા પ્રમાણમાં પાણી વહેતુ થયું છે. જેના કારણે ગાગોદર નદીની આસપાસ રહેતા લોકોને એલર્ટ રહેવા સૂચના આપવામાં આવી છે. લોકોને અન્ય જગ્યાએ સ્થળાંતર કરવા સૂચના આપવામાં આવી છે. ડેમમાંથી વહેતા પાણીનો પ્રવાહ ખૂબજ ભયાનક હોવાથી લોકોને સ્થળ છોડી દેવા સૂચના અપાઈ છે.
અંજારને ટપ્પર ડેમ એવરફલો થયો
કચ્છમાં ભારે વરસાદને કારણે અંજારને ટપ્પર ડેમ એવરફલો થયો છે. ટપ્પર ડેમના સાત દરવાજા ખોલવામાં આવ્યાં છે. પાણી છોડાતા નીચાણ વાળા વિસ્તારોને એલર્ટ કરાયા છે. આ ઉપરાંત સામખિયાળીમાં ભારે વરસાદને કારણે નીચાણવાળા વિસ્તારોમાં પાણી ભરાઈ ગયાં છે. સામખિયાળી ટોલ અને પોલીસ સ્ટેશન પાણીમાં ગરકાવ થઈ ગયું છે. ભુજના હમીરસર તળાવમાં નવા નીર આવતાં તળાવની આસપાસ પોલીસનો બંદોબસ્ત ગોઠવી દેવાયો છે. હમીરસર તળાવ ઓવરફ્લો થવાની તૈયારીમાં છે.