મહેસાણાના ખેરાલુ પંથકમાં ભારે વરસાદ વરસ્યો હોવાની વાત સામે આવી છે. ખેરાલુ પંથકમાં 3 ઈંચ વરસાદ વરસ્યો છે અને રેલવે અંડરપાસમાં પાણી ભરાતા લોકોને હાલાકી પડી રહી છે, ખેરાલુના પૂર્વ વિસ્તાર તરફનો વાહન વ્યવહાર ખોરવાયો છે, પાણી ભરાતા વાહનચાલકો અટવાયા છે, ઘણા વાહનો પાણીમાં બંધ પડી જવાની પણ સમસ્યા ઉભી થઈ છે.
રાજ્યમાં વરસાદથી જળાશયોમાં પાણીની આવક
ઉ.ગુજરાતમાં વરસાદથી ધરોઈ ડેમમાં પાણીની આવકમાં વધારો થયો છે, પાણીની આવક થતા ધરોઈ ડેમ 80 ટકા ભરાયો છે, હાલ ધરોઈ ડેમની જળ સપાટી 618 ફૂટ પર પહોંચી છે, 622 ફૂટની સપાટીએ ધરોઈ ડેમ થાય છે ઓવરફ્લો, તો બીજી તરફ હાલ ડેમમાં 46 હજાર ક્યુસેકથી વધુ પાણીની આવક નોંધાઈ છે. 800થી વધારે ગામડાઓ તેમજ 40 જેટલા શહેરો માટે પાણીની સમસ્યા દૂર થશે, ધરોઈ ડેમમાં પાણીની આવક વધતા નીચાણવાળા વિસ્તારોને એલર્ટ કરવામાં આવ્યા છે.
છેલ્લા 24 કલાકમાં ગુજરાતના 181 તાલુકાઓમાં વરસાદ
છેલ્લા 24 કલાકમાં ગુજરાતના 181 તાલુકાઓમાં વરસાદ નોંધાયો છે, સૌથી વધુ બનાસકાંઠાના વડગામમાં 7.52 ઈંચ વરસાદ, અરવલ્લીના મોડાસામાં 6.22 ઈંચ વરસાદ, તલોદમાં 5.31 ઈંચ, સિદ્ધપુરમાં 5.16 ઈંચ, કપરાડામાં 4.92 ઈંચ, દહેગામમાં 4.80 ઈંચ, કઠલાલમાં 4.17 ઈંચ, મહેસાણામાં 3.98 ઈંચ, ધરમપુરમાં 3.78 ઈંચ, પ્રાંતિજમાં 3.66 ઈંચ, કંડાણામાં 3.58 ઈંચ, ડીસામાં 3.58 ઈંચ, ધનસુરામાં 3.50 ઈંચ, સતલાસણામાં 3.31 ઈંચ વરસાદ નોંધાયો છે.
