નવસારી જિલ્લાના વાંસદા અને ચીખલી તાલુકામાં ભારે પવન અને ગાજવીજ સાથે વરસેલા ધોધમાર વરસાદે ઠેર-ઠેર તારાજી સર્જી છે, જેના કારણે જનજીવન અસ્તવ્યસ્ત થઈ ગયું છે. વાવાઝોડા જેવી પરિસ્થિતિને કારણે બંને તાલુકાઓમાં મોટા પાયે નુકસાન નોંધાયું છે.
વાંસદામાં માર્ગો અને વીજળી પુરવઠાને અસર
વાંસદા તાલુકામાં ભારે પવનના કારણે અનેક જગ્યાએ વૃક્ષો અને વીજળીના થાંભલા (વીજ પોલ) ધરાશાયી થયા છે. ભારે પવનમાં વિશાળ વૃક્ષો તૂટીને મુખ્ય માર્ગો પર પડતાં વાહનવ્યવહાર અવરોધાયો હતો. વીજ પોલ તૂટી પડવાને કારણે ઘણા વિસ્તારોમાં વીજ પુરવઠો ખોરવાઈ ગયો હતો, જેનાથી લોકોને હાલાકી વેઠવી પડી હતી. પરિસ્થિતિને ધ્યાનમાં રાખીને, વહીવટી તંત્ર દ્વારા તાત્કાલિક ધોરણે રાહત કામગીરી હાથ ધરવામાં આવી છે. માર્ગો પરથી ધરાશાયી થયેલા વૃક્ષો હટાવીને વાહનવ્યવહાર પૂર્વવત્ કરવાની કામગીરી ચાલી રહી છે.
