રાજકોટ જિલ્લાના જસદણ અને આસપાસના ગ્રામ્ય વિસ્તારોમાં મેઘરાજાએ જોરદાર બેટિંગ કરતાં ધોધમાર વરસાદ વરસ્યો છે. આ અવિરત વરસાદને કારણે જસદણના મુખ્ય માર્ગો પર પાણી ફરી વળ્યા હતા, જેના પગલે વાહનવ્યવહારને અસર થઈ હતી અને નીચાણવાળા વિસ્તારોમાં જળભરાવની સ્થિતિ સર્જાઈ હતી. માત્ર જસદણ શહેર જ નહીં, પરંતુ તેના ગ્રામ્ય વિસ્તારો જેવા કે આટકોટ, સાણથલી, શિવરાજપુર અને બાખલવડમાં પણ ભારે વરસાદ નોંધાયો છે. ખેતી માટે આ વરસાદ રાહતરૂપ છે, પરંતુ શહેરના રસ્તાઓ પર પાણી ભરાવાને કારણે લોકોને હાલાકીનો સામનો કરવો પડ્યો છે. આ વિસ્તારમાં વરસાદી માહોલ જામતા વાતાવરણમાં ઠંડક પ્રસરી છે.
જેતપુરમાં સતત ચોથા દિવસે મેઘવર્ષા
જસદણની જેમ જ રાજકોટના અન્ય એક મહત્ત્વપૂર્ણ શહેર જેતપુરમાં પણ સતત ચોથા દિવસે વરસાદી માહોલ જળવાઈ રહ્યો છે. વરસાદે વિરામ ન લેતા શહેરના વિવિધ વિસ્તારોમાં પાણીનો ભરાવો થયો છે. જેતપુરના મુખ્ય વિસ્તારો જેવા કે તીનબત્તી ચોક, વડલી ચોક, અમરનગર, એમજી રોડ, ફૂલવાડી તીનબત્તી અને કણકિયા પ્લોટ સહિતના વિસ્તારોમાં વરસાદી પાણી ફરી વળ્યા છે. સતત વરસાદને કારણે શહેરના માર્ગો પર પાણી ભરાતા વાહનચાલકો અને રાહદારીઓને મુશ્કેલી પડી રહી છે. નીચાણવાળા વિસ્તારોમાં વસતા લોકોને સાવચેત રહેવા માટે તંત્ર દ્વારા સૂચના આપવામાં આવી છે.
