વલસાડ શહેરમાં છ કલાકમાં 6:30 ઇંચ વરસાદથી શહેરના અલગ અલગ વિસ્તારોમાં પાણી ભરાયા ત્યારે વલસાડ શહેરની મહાદેવનગર સોસાયટીમાં કમર સમા પાણી ભરાતા એક કાર સાથે કારચાલક ફસાયો હતો, સાથે કેટલાક લોકોના વાહનો પણ બંધ પડ્યા હતા લોકો વાહનોને ધક્કો મારવા મજબૂર બન્યા હતા..
વલસાડ શહેરમાં 6 કલાકમાં સાડા છ ઈંચ વરસાદ
વરસાદમાં દર વખતે આ જ રીતે પાણી ભરાય છે તેવી ફરિયાદ સ્થાનિકો કરી રહ્યાં છે, મહાદેવનગર વિસ્તારમાં દર વર્ષે પાણી ભરાતા લોકો હેરાન થઈ ગયા છે, પાણી એ હદે ભરાયા છે કે લોકોને ઘરની બહાર નીકળવું મુશ્કેલ છે સાથે સાથે દુકાનોમાં પણ વરસાદી પાણી ઘૂસ્યા છે, જેના કારણે વેપારીઓને પણ નુકસાન થયું છે, વલસાડ શહેરમાં જરાક અમથો વરસાદ પડે છે અને પાણી ભરાઈ જાય છે, ત્યારે નગરપાલિકાના સત્તાધીશો પણ બહાર નીકળતા નથી અને લોકોની સમસ્યા ઠેરની ઠેર રહે છે.
સવારે 6 થી 10 વાગ્યા સુધીમાં વલસાડમાં સૌથી વધારે વરસાદ નોંધાયો છે
વલસાડ જિલ્લામાં વહેલી સવારથી વરસાદ ખાબકી રહ્યો છે, વલસાડ 3.78 ઈંચ, પારડી 2.87 ઈંચ, ચિખલી 1.65 ઈંચ, ગણદેવી 0.79 ઈંચ, છોટા ઉદેપુર 0.67 ઈંચ, નડિયાદ 0.51 ઈંચ, ઉંમરગામમાં 0.63 ઈંચ, ખેરગામમાં 0.59 ઈંચ વરસાદ ખાબકયો છે.
વલસાડનો છીપાવાડ અંડરપાસ બંધ
વલસાડ જિલ્લામાં વહેલી સવારથી ધોધમાર વરસાદને કારણે શહેરના અનેક વિસ્તારોમાં પાણી ભરાયા ત્યારે વલસાડ શહેરથી ચાલીસ ગામને જોડતો છીપાવાડ અંડરપ્રાસ પણ પાણીમાં ગરકાવ થયો હતો જેને લઈને વલસાડથી ખેરગામ તાલુકા સુધી આવતા 40 જેટલા ગામોમાં અવરજવર કરતા લોકોને 10 થી 12 કિલોમીટરનો ચકરાવો કરીને અવરજવર કરવાનો વારો આવ્યો છે ત્યારે લોકોએ વલસાડ નગરપાલિકાની પ્રિમોન્સૂન કામગીરી પર સવાલો ઉઠાવ્યા અને વરસાદને લઈને ધંધા રોજગાર પર પણ અસર દેખાઈ છે.
