રાજ્યમાં હવામાન વિભાગ દ્વારા વરસાદને લઈને મોટી આગાહી કરવામાં આવી છે. હવામાન વિભાગના જણાવ્યા અનુસાર, આગામી કલાકો દરમિયાન સમગ્ર ગુજરાતમાં સાર્વત્રિક વરસાદી માહોલ જામશે. ખાસ કરીને દક્ષિણ ગુજરાતના વિસ્તારોમાં મેઘરાજા મુશળધાર વરસી શકે છે. વરસાદની તીવ્રતાને ધ્યાને રાખીને તંત્ર દ્વારા સંબંધિત જિલ્લાઓમાં એલર્ટ પણ જારી કરી દેવામાં આવ્યું છે.
હવામાન વિભાગની આગાહી મુજબ આજે દક્ષિણ ગુજરાતના વલસાડ, નવસારી, ડાંગ અને તાપી જિલ્લામાં અતિભારે વરસાદ પડી શકે છે. આ ઉપરાંત કેન્દ્રશાસિત પ્રદેશ દમણ અને દાદરા નગર હવેલીમાં પણ મુશળધાર વરસાદની શક્યતાઓને પગલે ‘ઓરેન્જ એલર્ટ’ જાહેર કરવામાં આવ્યું છે. તંત્ર દ્વારા નીચાણવાળા વિસ્તારોમાં રહેતા લોકોને સાવચેત રહેવા અને નદી-નાળાથી દૂર રહેવા સૂચના આપવામાં આવી છે.
બીજી તરફ, મધ્ય ગુજરાત અને દક્ષિણ ગુજરાતના અન્ય ભાગોમાં પણ ભારે વરસાદની સંભાવના વ્યક્ત કરવામાં આવી છે. હવામાન વિભાગ દ્વારા આણંદ, વડોદરા, નર્મદા, છોટાઉદેપુર, સુરત અને ભરૂચ જિલ્લાઓમાં ‘યલો એલર્ટ’ સાથે ભારે વરસાદની આગાહી કરવામાં આવી છે. પવન અને ગાજવીજ સાથે વરસાદ થવાની શક્યતા હોવાથી ખેડૂતો અને સામાન્ય નાગરિકોને જરૂરી તકેદારી રાખવા અપીલ કરવામાં આવી છે.
