રાજકોટ શહેરમાં ગઈકાલ રાતથી સતત ધીમી ધારે વરસાદ વરસી રહ્યો છે અને અત્યાર સુધીમાં કુલ 4.5 ઇંચ જેટલો વરસાદ નોંધાયો છે. જોકે, આ સામાન્ય અને ધીમી ધારે પડેલા વરસાદે જ રાજકોટ મહાનગરપાલિકા (RMC)ની કામગીરીની પોલ ખોલી નાખી છે. પ્રી-મોન્સૂન કામગીરી અને પાણીના નિકાલ અંગે મનપા દ્વારા કરવામાં આવેલા તમામ દાવાઓ પહેલા જ વરસાદી રાઉન્ડમાં પોકળ સાબિત થયા છે.
યાજ્ઞિક રોડ અને 150 ફૂટ રિંગ રોડ પર ભરાયા પાણી
શહેરના મુખ્ય અને ધમધમતા એવા યાજ્ઞિક રોડ તેમજ 150 ફૂટ રિંગ રોડ જેવા વિસ્તારોમાં પાણી ભરાઈ જતાં વાહનચાલકો અને રાહદારીઓ ભારે મુશ્કેલીમાં મુકાયા હતા. યોગ્ય ગટર વ્યવસ્થાના અભાવે માર્ગો પર નદીઓ વહેતી હોય તેવા દ્રશ્યો સર્જાયા હતા, જેના કારણે કલાકો સુધી વાહન વ્યવહાર ખોરવાયો હતો અને સ્થાનિકોને ભારે હાલાકી ભોગવવી પડી હતી.