નડિયાદ શહેરમાં શનિવારે અડધી રાત્રે નડિયાદ ફાયરબ્રિગેડ અને પોલીસની ટીમ દોડતી થઈ હતી. નડિયાદના ખેતા તળાવ પાસે એક ગટરલાઈનમાં એક યુવાન ફસાઈ ગયો હતો. ફાયરબ્રિગેડ અને પોલીસે લગભગ ચારેક કલાકની જહેમત બાદ યુવાનને જીવિત બહાર કાઢયો હતો.
નડિયાદના ખેતાતળાવ પાસેથી પસાર થતી એક ગટરલાઈનમાં રાત્રીના ત્રણેક વાગ્યાના સુમારે એક યુવાન મદદ માટે બુમો પાડી રહ્યો હતો. જેથી એક રાહદારીએ આ મામલે તુરતજ નડિયાદ ફાયરબ્રિગેડને કોલ કર્યો હતો. બનાવની જાણ થતાં જ નડિયાદ ફાયરબ્રિગેડના ફાયર ઓફીસર ચિરાગભાઈ ગઢવી તથા નડિયાદ ટાઉન પોલીસની ટીમ ઘટના સ્થળે દોડી આવી હતી. બંને ટીમોએ યુવાનને બહાર કાઢવાનો પ્રયાસ કર્યો હતો. પણ યુવાનનો પગ ફસાઈ ગયો હોય તે બહાર આવી શકતો ન હતો. જેથી જેસીબીથી રોડ તોડીને પણ તેને બહાર કાઢવાનો પ્રયાસ કર્યો હતો. પણ આરસીસી રોડ તૂટી શક્યો ન હતો. આખરે બંને ટીમોએ તેને ગટરલાઈનમાંથી જ બહાર કાઢવાનો પ્રયાસ કર્યો હતો. આખરે ચારેક કલાકની જહેમત બાદ યુવાનને જીવિત બહાર કાઢવામાં બંને ટીમો સફળ રહી હતી. યુવાન અર્ધનગ્ન હાલતમાં, અને માનસિક હતાશ હોઈ તેવું તેની વાતચીત પરથી ટીમને જણાઈ આવ્યું હતું. શ્વાન પાછળ પડતા યુવાન બચવા માટે ગટરલાઈનમાં સંતાઈ ગયો હોવાનું તેણે પોલીસને જણાવ્યું હતું.
