નવસારી જિલ્લામાં સાયબર ક્રાઇમની એક ગંભીર ઘટના સામે આવી છે, જેમાં એક યુવાને આર્ટિફિશિયલ ઇન્ટેલિજન્સ (AI) ટેક્નોલોજીનો દુરુપયોગ કરીને ગામની યુવતીઓના બિભત્સ ફોટા બનાવીને સોશિયલ મીડિયા પર પોસ્ટ કર્યા હતા. નવસારી સાયબર ક્રાઇમ પોલીસે આ મામલે આરોપી યુવાનને ઝડપી પાડીને કાયદેસરની કાર્યવાહી હાથ ધરી છે.
યુવાને AI દુરુપયોગ કરીને યુવતીના બિભત્સ ફોટા પોસ્ટ કર્યા
આ ઘટના ગણદેવી તાલુકાના ધોલાઈ ગામના એક યુવાનનું કારસ્તાન છે. આરોપી યુવાન ગામનાં જ યુવક-યુવતીઓના સામાન્ય ફોટાનો ઉપયોગ કરીને AI (આર્ટિફિશિયલ ઇન્ટેલિજન્સ)ના માધ્યમથી તેમના બિભત્સ અને અશ્લીલ ફોટા બનાવતો હતો. આ બનાવટી અને બિભત્સ ફોટાને તે સોશિયલ મીડિયા પ્લેટફોર્મ ઇન્સ્ટાગ્રામ પર પોસ્ટ કરતો હતો.ગામની એક યુવતીને આ અંગે જાણ થતાં તેણે તાત્કાલિક સાયબર ક્રાઇમ પોલીસ મથકમાં ફરિયાદ નોંધાવી હતી, જેના પગલે આ સમગ્ર ભાંડો ફૂટ્યો હતો.
