ગુજરાતમાં સ્થાનિક સ્તરે યોજાયેલી નગરપાલિકા અને તાલુકા પંચાયતની પેટાચૂંટણીઓના પરિણામોમાં ભારતીય જનતા પાર્ટીએ (BJP) પ્રચંડ જીત મેળવીને પોતાનો દબદબો જાળવી રાખ્યો છે. ખાસ કરીને પંચમહાલના શહેરા, સાબરકાંઠાના ઈડર અને નર્મદાના તિલકવાડામાં ભાજપે વિરોધ પક્ષોને પરાજિત કરીને વિજયધ્વજ લહેરાવ્યો છે.
શહેરા નગરપાલિકા: 20 વર્ષનું શાસન અને અજેય ગઢ
પંચમહાલ જિલ્લાની શહેરા નગરપાલિકામાં ભાજપે ઇતિહાસ રચ્યો છે. નગરપાલિકાની કુલ 28 બેઠકો માંથી તમામ 28 બેઠકો પર ભાજપના ઉમેદવારો વિજેતા જાહેર થયા છે. નોંધનીય છે કે, ૨૮ માંથી ૧૭ બેઠકો તો મતદાન પહેલા જ બિનહરીફ થઈ ચુકી હતી, જ્યારે બાકીની ૧૧ બેઠકો માટે યોજાયેલા મતદાનમાં પણ જનતાએ ભાજપ પર જ કળશ ઢોળ્યો છે. શહેરામાં છેલ્લા 20 વર્ષથી ભાજપનું એકહથ્થું શાસન છે અને આ વખતે પણ કોંગ્રેસ, આમ આદમી પાર્ટી કે અપક્ષના કોઈ પણ ઉમેદવાર પોતાનું ખાતું ખોલાવી શક્યા નથી. જીત બાદ કાર્યકરોએ ફટાકડા ફોડી અને વિજય સરઘસ કાઢીને હર્ષોલ્લાસ મનાવ્યો હતો.