સ્થાનિક સ્વરાજ્યની ચૂંટણીના મતદાનના આડે હવે ગણતરીના કલાકો બાકી છે ત્યારે મહેસાણા શહેરમાં હત્યાની એક સનસનાટીભરી ઘટના સામે આવી છે. શહેરના એ-ડિવિઝન પોલીસ સ્ટેશન વિસ્તારમાં ગઈકાલે મોડી રાત્રે અંગત અદાવતમાં એક યુવકની ઘાતકી હત્યા કરવામાં આવતા ચકચાર મચી ગઈ છે.
મહેસાણામાં મતદાન પૂર્વે જ લોહિયાળ ખેલ
મહેસાણાની માનવ આશ્રમ ચોકડીથી તાવડિયા રોડ તરફ જઈ રહેલા મિતેન ચૌધરી અને તેના મિત્રો પર 4 થી 5 અજાણ્યા ઇસમોએ હુમલો કર્યો હતો. હુમલાખોરોએ મિતેન ચૌધરીની ગાડી રોકીને તેના પર તીક્ષ્ણ હથિયાર અને પાઈપ વડે જીવલેણ હુમલો કર્યો હતો. આ હુમલામાં ગંભીર રીતે ઘવાયેલા મિતેન ચૌધરીનું સારવાર દરમિયાન મોત નીપજ્યું છે, જ્યારે તેનો મિત્ર ધીમન ચૌધરી હાલ હોસ્પિટલમાં જીવન-મરણ વચ્ચે ઝોલા ખાઈ રહ્યો છે.
